تانیش یاد
کافه تۆنلوک‌دور، بوْش ماسا آختاریرام، بۆتون
ماسالار دوْلودور. گؤز گزدیریرم، کافه‌نین بۇجاغیندا، یاریسی شۆشه‌دن اوْلان دوُوارین یانیندا ایکی آداملیق ماسادا بیر قؽز تک اوْتوروب.
ماسالارین آراسیندان سوْووُشوب اوْنا ساری گئتمه‌یه باشلاییرام. ماسالاردان دئییب گۆلمک
سسی، قهوه-چای و سیقارئت اییی گلیر، کافه‌نین آتموسفئرینی غریبه بیر ترکیب
بۆرویوب، قوْخولو سسلر یا دا سسلی قوْخولار!
«بۇرا بوْش مۇ، یوْخسا گؤزله‌دی‌یینیز بیرینین
یئری‌دیر؟» دئیه قؽزدان سوْروشورام.
قؽز ائشیتمیر. دایانیب اوْنا باخیرام، دالغین گؤرونور،
ال تئلئفونونا دالمیش، دئیه‌سن. باشیندا قیرمیزی شال وار، قارا ساچلاری شالین آلتیندان
چیخیب اۆزونه و چیینینه تؤکولوب.
قیزدان جاواب گلمه‌دی‌یینه گؤره قاییدیب کافه‌دن
چؽخیب گئتمک ایسته‌ییرم، دالدان بیر سس ائشیدیرم.
«ایسته‌سه‌نیز، اوْتورا بیلرسینیز.»
قاییدیرام، قیز منه باخیر، دوْداغیندا سوْلغون
بیر گۆلومسه‌مه وار.
«اوْتورون، من تکَم.»
قیزین قاباغیندا بیر فینجان قهوه وار، بیر آز اوْ
یانلیقدا بوْش بیر کۆل‌قابی وار.
«سیز ده تک‌سینیز؟!» دئیه سوْروشور مندن.
«هه، بۇگون تکَم.»
«بوُ یاخشی‌دیر، قوْشا اوْلسایدینیز، بیرینیز
آیاق اۆسته قالمالی اوْلاجاقدینیز!» دئییب گۆلور.
«ائله‌دیر، آرال، یوْلداشیمی دئییرم، بۇگون سئوگیلی‌سی‌یله ائشییه چؽخیب.»
گۆلومسه‌ییرم، قؽز ایسه فینجانی گؤتوروب قهوه‌دن
بیر قۇرتوم ایچیر. فینجانین قیراغیندان بوْیلانان گؤزلری دالغین گؤرونور.
قؽز تانیش گؤرونور منه، اوْنو هاراداسا گؤردویومو
دۆشونورم.
«تانیش گؤرونورسونوز منه، هاراداسا گؤروشمه‌میشیک
می؟!» دئیه منه باخیر.
فیکریمی اوْخودو مۇ بوُ قؽز؟! من بوُ سوْرغونو سوْروشماق
ایسته‌ییردیم.
«من ده سیزی بیر یئرده گؤردویومو دۆشونورم!»
«دئمه‌لی، تانیشیق، اوْنا گؤره ده سیز بیرباشا
گلیب بوُ ماسادا منیم‌له اوْتورموسونوز!»
گۆلوشوروک.
گؤزلرینه اوْداقلانیرام، قۇمرال‌دیر، تانیش‌دیر،
آنجاق یادلیغی دا وار. بلکه بوُ قؽزی هئچ گؤرمه‌میشم،
گؤردویومو سانیرام، کیمه‌سه بنزه‌دیرم، بلکه ده یۇخودا گؤرموشم!
قارسونا ایکی قهوه تاپشیرارام، قؽزین قاباغینداکی
بوْش فینجانی گؤتوروب گئدیر.
«سیقارئت چکرسینیز؟» دئییب قۇتودان بیر گیله چیخاردیر.
«هردن‌بیر.»
«اوْندا بوُ آخشام دا اوْ هردن‌بیردن اوْلا
بیلر؟!» دئییب گۆلور.
گۆلوشو ده تانیش‌دیر، دئیه‌سن.
«اوْلا بیلر!»
گۆلومسه‌ییرم.
چاخماغی چاخیر، سیقارئتلریمیزین تۆستوسو
بیربیرینه قاریشیر. تۆستونون آرخاسیندان بنیزینده‌کی تانیش‌لیق بیر آز دا آرتیر.
«آرخایینام، سیزی یۆزده یۆز بیر یئرده گؤرموشم!
دئییرم.
«نه دئییم! منه ده ائله گلیر.»
«بوُ کافه‌یه تئز-تئز گلرسینیز؟»
«هه، هفته‌ده بیر یوْل گله‌رم،» دئییب تۆستونو
تاوانا ساری پیله‌ییر. «سیز نئجه؟»
«من ده آیدا بیر یوْل،» دئییرم.
«بلکه ائله بۇرادا قارشیلاشمیشیق!»
«بلکه!»
هردن یۇخودا گؤردویوم بیر قؽز وار، بوُ اوْنا دا
بنزه‌ییر، دئیه‌سن!
«تئز-تئز یۇخو گؤررسینیز؟!» دئیه سوْروشور.
«یوْخ، هردن‌بیر.»
«دئیه‌سن، سیزده هر نه هردن‌بیردیر!» دئییب،
قاققیلداییب گۆلور.
«سیز نئجه؟!»
«من تئز-تئز یۇخو گؤره‌رم. بیلیرسینیز، یۇخولار
زامانسیز اوْلور، بوُ دۆنیانین یاسالارینا، قایدالارینا بوْیون اَیمیر، قاداغالاری
پوْزور، اؤلولری دیریلدیر!»
«هئچ بۇنلاری دۆشونمه‌میشدیم ایندی‌یه‌جن!» دئییب
بیر آز چاشقین‌لیقلا اوْنا باخیرام.
گۆلور، پنجره‌دن ائشییه باخیر، من ده باخیرام،
قارانلیق دۆشمکده، ماشینلار سوْووُشماقدادیر.
سیقارئتیمی سؤندورورم، آرامیزداکی تۆستو بیر
یۆنگوللـه‌شیر، قؽزین بنیزینده‌کی تانیش‌لیق آزالیر.
«گئتمه‌لی‌یم، هاوا قارانلیقلاشیر،» دئییب
سیقارئتینی کۆل‌قابیدا سؤندورور.
تۆستو چکیلیر، قؽزین اۆزونده‌کی یادلیق بیر آز دا
آرتیر.
آیاغا قالخیر.
«یئنه گؤروشه بیله‌ریک می؟!» سوْروشوب قیزین اۆزونه
باخیرام.
«بیلیمیرم، بلکه! من گئچمیشی تئز-تئز اۇنودورام،
بلکه گلَن گۆنلرده بوُ گؤروشو ده اۇنوتدوم! هله‌لیک!»
قؽز گئدیر.
تانیش یاد ساندیغیم بیرینین بۆتونلوکله منه یاد
اوْلدوغونو دۆشونورم. دۇوارداکی ساعاتا باخیرام، آرتیق من ده گئتمه‌لی‌یم.
ال تئلئفونومون زنگی ایله یۇخودان اوْیانیرام،
ساعات آلتی یاریم‌دیر، ایشه گئتمه‌لی‌یم!
Comments
Post a Comment