لاتاری

یازان: شیرلی جکسون
تۆرکجه‌سی: کۆیولو نجاری سعید

اييوُن'ون ييرمی يئدديسی سحر چاغی هاوا آچيق و گۆنشلی ايدی؛ بۆتؤو بير ياي گۆنونون جانلي ايستی‌سی ايله گۆللر بوْل ـ بوْل چيچكلنميش، چمن‌ليكلرسه يام‌ياشيل ايدی. كند اهاليسي، ساعات اوْنا بير آز قالميش پوْست‌خانا ايله بانك آراسينداكی مئيدانا توْپلاشماغا باشلادی؛ بعضی شهَرلرده اهالي‌نين چوْخ اوْلدوغونا گؤره لاتاری ايكی گۆن چكير، اييون'ون ييرمي آلتی‌سيندان باشلانمالی‌يدی، آما يالنيز اۆچ يۆز نفر اهاليسی اوْلان بوُ كندده، لاتاری'نين بۆتونو ايكی ساعاتدان آز چكيردی، بئله كی، سحر ساعات اوْندا باشلانيب، كندليلرين ناهارا ائوه گئده بيلمه‌سی اۆچون ائله واختيندا قوُرتارا بيليردی. 

البته كي هاميدان اؤنجه اوُشاقلار ييغيشدي. مكتب يئنيجه ياي تعطيلينه باشلاميش، آزادليق دوُيغوسو هيجانلا اوُشاقلارين جانينا هوْپموشدو؛ اوْنلار هاي ـ كۆيلو اوْيونا باسيب گيرمه‌دن، سس‌سيزجه آزاجيق بير يئره توْپلاشماق فيكرينده‌يديلر، دانيشيقلاري هله ده صينيفله مۆعلّيم، كيتابلارلا دانلاقلار حاققيندايدي. بابي مارتين يئنيجه جيبلريني داشلا دوْلدورموشدو، اوْ بيري اوْغلانلارسا ان هامار و يوُمرو داشلاري سئچه‌رك، اوْنو ايزله‌ديلر؛ بابي، هاري جونز و ديكي دئلاكروز ــ كندليلر اوْنو «دئلاكروي» چاغيريرديلار ــ سوْنوندا مئيدانين بير بوُجاغيندا داشدان بؤيوك بير توْپا دۆزَلديب،‌ اوْنو باشقا اوْغلانلارين باسقينيندان قوْروماغا باشلاديلار. قيزلار قيراقدا دوُرموشدولار، اؤز آرالاريندا دانيشاراق چيیينلرينين اۆستوندن اوْغلانلارا باخيرديلار، بالاجا اوُشاقلارسا توْزدا يوُوارلانير، يا دا بؤيوك باجي ـ قارداشلارينين اليندن ياپيشميشديلار. 

چوْخ كئچمه‌دي اؤز اوشاقلاريني گؤزدن كئچيريب، اكينله ياغيشدان و تراختورلا وئرگيلردن دانيشان كيشيلر توْپلاشديلار. هاميسي بوُجاقداكي داش توْپاسيندان اوُزاقدا دايانير، ياواش ظارافات ائدير، گۆلمكدن چوْخ گۆلومسه‌ييرديلر. رنگي قاچميش ائو اوْيماسي و ايستي كؤينكلري‌يله قادينلار بير آز كيشيلردن سوْنرا گلديلر، سالاملاشيب ارلرينين يانينا گئدَركن بير نئچه دئدي ـ قوْدو ائتمكدن ده قالماديلار. آز سوْنرا ارلرينين يانيندا دايانان قادينلار اوُشاقلاريني سسله‌مه‌يه باشلاديلار، اوُشاقلارسا دؤرد ـ بئش دفعه سسله‌نيلمه‌لي اوْلماقدان سوْنرا گؤيولسوزجه گلديلر. بابي مارتين آناسي‌نين برك ياپيشان اليندن بوُراخيليب، گۆله ـ گۆله داش توْپاسينا دوْغرو قاچدي. آتاسي اوْنون باشينا قيشقيردي، بابي ايسه سۆرعتله گليب آتاسي ايله بؤيوك قارداشي‌نين آراسيندا يئريني توُتدو.

لاتاري'ني، ــ مئيدان رقصلري، يئني‌يئتمه‌لر كوُلوبو و هالوْوين پروْقرامي كيمي ــ مدني چاليشمالارا آييرماق اوچون واختي و انرژيسي اوْلان ساميرز بَي آپاريردي. اوْ، اۆزو يوُمرو، قايناييب ـ قاريشان بير كيشي ايدي و داش كؤمور ايشينه باخيردي، خالق اوْنا آجيييردي، اوُشاغي يوْخ ايدي چۆنكو، آروادي دا زهَرله‌ين ايدي. اوْ، الده قارا تاختالي قوُتو ايله مئيدانا چاتاندا، كندليلرين آراسيندا پيچيلتيلي بير دانيشيق دۆشدو، ساميرز بَي ال ساللاييب، «بوُگۆن بير آز گئج اوْلدو، جاماعات.» دئدي. پوْست باشقاني، قرئيوز بَي، اۆچ‌قیچلی كتيلي داشيياراق، اوْنون آردينجا گئديردي، كتيلي مئيدانين اوْرتاسينا قوْيدو و ساميرز بَي قارا قوُتونو اوْنون اۆستونده يئرلَشديردي. كندليلر كتيلدن آرالي دوُراراق فاصيله‌ني قوْرويوردولار و ساميرز بَي «سيز يوْلداشلاردان بيري منه ال يئتيرمك ايسته‌يير مي؟» دئيه‌نده، قوُتونون ايچينده‌كي كاغيذلاري قاريشديريب، اوْنو كتيل اۆستونده مؤحكم ساخلاماق اۆچون مارتين بَي ايله بؤيوك اوْغلو باكستر ايره‌لي گلمه‌دن اؤنجه، بير تردّود ياشاندي.

لاتاري'نين اصل شئي ـ شۆيو چوْخدان ايتميشدي و ايندي كتيل اۆستونده دايانان قارا قوُتو، حتا شهَرده اوْلان ان قوْجا كيشي اوْلد من وارنير دوْغولماميشدان اؤنجه ايشله‌نيلمكده‌يميش. ساميرز بَي كندليلرله تزه قوُتو دۆزَلتمك حاققيندا دؤنه ـ دؤنه دانيشميشدي، آما هئچ كيم حتا ايسته‌ميردي قارا قوُتونون تمثيل ائتدی‌یی گله‌نه‌يي پوْزسون. اينديكي قوُتونون، بوُرادا كندي تيكمك اۆچون يئرله‌شن ايلك آداملارين دۆزَلتديكلري قاباقكي قوُتونون نئچه تيكه‌سيندن دۆزَلديلمه‌سي حاقدا بير ناغيل وار ايدي. هر ايل لاتاري'دن سوْنرا ساميرز بَي يئنه تزه قوُتو حاققيندا دانيشماغا باشلاردی، آما بير ايش گؤرمه‌دن، مؤوضوع اوُنودولوب گئدَردي. قارا قوُتو هر ايل بير آز داها داغيليردي؛ آرتيق، بۆتؤو قارا دئييلدي، بير طرفي ياريلميشدي و آغاجين اصل رنگي گؤرونوردو، بعضي يئرلرينين رنگي سوْلموش، بعضي يئرلرينه ايسه لكه دۆشموشدو.

ساميرز بَي كاغيذلاري اللري‌يله آخيراجان قاريشديرانا قدَر، مارتين بَي و بؤيوك اوْغلو باكستر قارا قوُتونو مؤحكم كتيل اۆستونده ساخلاديلار. گله‌نه‌يين چوْخونون اوُنودولوب یا دا بوُراخیلماسی اوُجباتيندان ساميرز بَي نسيللر بوْيو ايشله‌ديلن آغاج تيكه‌لرينين يئرينه كاغيذ زوْلاقلارينی یئرلَشدیرمکده اوْغور قازانميشدي. ساميرز بَي'ه گؤره، آغاج تيكه‌لري كند كيچيك اوْلان زامان اۆچون چوْخ ياخشي ايميش، آما ايندي كي، اهالي اۆچ يۆزدن چوْخ ايدي و احتيمالجا آرتماغا دا داوام ائده‌جكدي، قارا قوُتويا آسانجاسینا سيغیشا بیله‌جک بير شئي ايشله‌ديلمه‌لی ايدي. لاتاري'دن قاباقكي گئجه ساميرز بَي ايله قرئيوز بَي كاغيذ زوْلاقلاريني دۆزَلديب قوُتويا قوْيوردولار، سوْنرا اوْنو ساميرز بَي'ين داش كؤمور شيركتي‌نين قالين صانديغا آپاريب، صاباح ائرته‌دن ساميرز بَي حاضيرلانيب اوْنو مئيدانا آپاراناجان، قيفيللي يئرده ساخلاييرديلار. ايلين قالانيني قوُتونو آرادان گؤتوروب، هردن بوُرا، هردنسه آيري يئره قوْيوردولار؛ قوُتو، بير ايل قرئيوز بَي'ين سامان آنباريندا، اوْ بيري ايل ايسه پوْست‌خانادا آياق آلتيندا قالمیشدی و هردن ده مارتين'ين باققال تۆکانیندا بير رفه قوْيولوب بوُراخيلميشدي.

ساميرز بَي لاتاري'نين باشلانماسيني بيلديرمه‌دن اؤنجه، ائله چوْخ هاي ـ كوي وار ايدي كي. عاييله‌ باشچيلاريندان، هر عاييله‌ده ائوده‌كيلرين باشچيلاري و عۆضولريندن ليستلر دۆزَلديلمه‌لي‌يدي. لاتاري'نين مأمورو اوْلان ساميرز بَي'ين اؤزَل آند ايچمه مراسيمي پوْست باشقاني الي‌يله گئچيريليردي؛ اهالي‌نين بعضي‌سي خاطيرلايير، بير زامانلار لاتاري مأمورو بير نؤوع رئسيتال ايجرا ائدَردي، هر ايل هاواسيز بير ديني ماهني باشدان ـ سوْوما اوْخوناردي، خالقين بعضي‌سي، ماهني اوْخوناندا، عادتن لاتاري مأمورونون دۆز آياق اوسته دوُرماسينا اينانيرديلار، باشقالاري ايسه اوْنون، خالق آراسيندا گزمه‌لي اوْلدوغونا اينانيرديلار، آما ايللر اؤنجه گله‌نه‌يين بوُ بؤلومونون سۆروشدورولمه‌سينه يوْل وئريلميشدي. لاتاري مأمورو عادتن گليب قوُتودان كاغيذ چكَن كيمسه‌يه مۆراجيعت ائدَنده، بير سالاملاما مراسيمي ده اوْلاردي، آما بوُ دا زامانلا دَييشميشدي و ايندي، يالنيز، مأمورون ياخينلاشان كيمسه ايله دانيشماسي لازيم ايدي. ساميرز بَي بۆتون بوُنلاري چوْخ ياخشي بيليردي؛ اوْ، تميز آغ كؤينَك و جين شالوار گئيينميشدی و ديقتسيزجه بير اليني قارا قوُتونون اۆستونه قوْيوب، آرا وئرمه‌دن قرئيوز بَي و مارتين'گيل ايله دانيشاركن، چوْخ ادبلي و اؤنَملي بير شخص كيمي گؤرونوردو.

ائله ساميرز بَي صؤحبتي سوْنوندا بوُراخيب، توْپلاشميش كندليلره دوْغرو دؤنَنده، خانيم هاچينسوْن، اۆست كؤينه‌ييني چييني اۆستونه آتميش، تله‌سيك مئيدانا چاتدي و تۆنلویون آرخاسيندا بير يئره تيزيخدي. يانيندا دوُران خانيم دئلاكروز'ا «تامامي‌يله هانسي گۆن اوْلدوغونو اوُنوتموشدوم،» دئدي و ايكي‌سي ده ياواشجا گۆلدولر. «اريمين اوْدون ييغماق اۆچون ائشييه چيخديغيني سانيرديم،» خانيم هاچينسوْن داوام ائتدي، «بير يوْل پنجره‌دن ائشييه باخديم، گؤردوم اوُشاقلار گئدیبلر، سوْنرا ياديما دۆشدو كي، بوُگۆن ييرمي يئدديسي‌دير، قاچا ـ قاچا گلديم.» اللريني اؤنلوكله قوُرولادي. خانيم دئلاكروز «يئنه ده واختيندا گليبسن. هله اوْ ياندا دانيشيرلار.» دئدي. 

خانيم هاچينسوْن تۆنلویون آراسيندان بوْيلاندي و قاباغا ياخين دوُران اري ايله اوُشاقلاريني گؤردو. اوْ، ساغ‌اوْللاشما علامتي اوْلاراق، خانيم دئلاكروز'ون قوْلوندان ياواش ووُروب، جاماعاتين آراسيندان اؤزونه يوْل آچماغا باشلادي. خالق گۆلر اۆزله آرالانيب اوْنا يوْل وئردي؛ ايكي ـ اۆچ نفر، خالق ايچينده ائشيديله بيلن اوُجا سسله «بوُدور خانيمين گلدي، هاچينسوْن،» و «سوْنوندا گليب چيخدي، بيل.» خانيم هاچينسوْن ارينه يئتيشدي، گؤزله‌مكده اوْلان ساميرز بَي سئوينجله «سن‌سيز باشلامالي اوْلاجاقديق سانيرديم، تئسي.» دئدي. خانيم هاچينسوْن ديشيني آغارداراق «آرتيق، قابلاريمي تاسدا قوْيوب گلمه‌يه‌جكديم، ائله دئییل مي جوْ؟» دئدي. خانيم هاچينسوْن'ون گليب چيخماسيندان سوْنرا، قيميلداناراق يئرينه قاييدان خالقين ايچيندن آلچاق گۆلوشمه سسي ائشيديلدي.

«ياخشي،» ساميرز بَي آغيللي ـ آغيللي دئدي، «سانيرام، باشلاساق ياخشي اوْلار، بوُنو بيرطرفليك ائله‌سك، ايشيميزه دؤنه بيله‌ريك. بوُرادا اوْلمايان وار مي؟»

نئچه نفر «دانبار،» دئدي. «دانبار، دانبار.»

ساميرز بَي ليستينه باخيب، «كلايد دانبار،» دئدي. «دۆزدور. اوْنون قيچي سينيب، ائله دئييل؟ كيم اوْنون اۆچون كاغيذ چكه‌جك؟»

بير قادين «سانيرام، من چكه‌جه‌يم،» دئدي، ساميرز بَي ايسه اوْنا ساري دؤنوب «آرواد ار اوچون كاغيذ چكير،» دئدي. «بوُ ايشي گؤرمك اۆچون يئتكين اوْغلون يوْخ موُ، جئيني؟» ساميرز بَي و كندده اوْلان باشقا كيمسه‌لر جاوابي چوْخ ياخشي بيلدسه‌لر ده، بئله سوْرغولاري رسميجه سوْروشماق لاتاري مأمورونون وظيفه‌سي ايدي. ساميرز بَي، خانيم دانبار جاواب وئرَركن، ادبلي بير ماراق ايفاده‌سي ايله گؤزله‌دي.

خانيم دانبار اۆزونتويله «هوْراس هله اوْن آلتي ياشينا گيرمه‌ييب،» دئدي. «دئيه‌سن اريمين يئرينه بوُ ايل من چكه‌جه‌يم.»

ساميرز بَي «ياخشي،» دئدي. الینده‌کی ليسته نه‌سه يازدي. سوْنرا سوْروشدو: «بالا واتسوْن كاغيذ چكه‌جك مي بوُ ايل؟»

اوُجا بير اوْغلان خالقين ايچينده اليني قالديردي. «بلي،» دئدي. «من آناملا اؤزوم اۆچون كاغيذ چكه‌جه‌يم.» نئچه سس جاماعاتين ايچيندن «ساغ اوْل ياخشي اوْغلان، ساغ اوْل جك،»  و «سنين آنانين بوُ ايشي گؤرمك اۆچون كيشي‌سي اوْلدوغونا سئوينيريك،» كيمي سؤزلر دئيَركن، اوْغلان سينيرلي ـ سينيرلي گؤزلريني قيرپيب باشيني آشاغي سالدي.

«ياخشي،» ساميرز بَي دئدي، «اوْلدو. سانيرام هامي بوُردادير. اوْلد من وارنير دا چكه‌جك؟»

بير سس «بلي،» دئدي و ساميرز بَي باشيني ترپَتدي.

ساميرز بَي بوْغازيني آريديب ليسته باخاندا قفيل بير سس‌سيزليك خالقي بۆرودو. «هامي حاضير‌ مي؟» سسلَندي. «ايندي، آدلاري اوْخوياجاغام، اؤنجه عاييله باشچيلاري‌يلا كيشيلر قوُتودان بير كاغيذ گؤتورجكلر. هامي‌نين سيراسي اوْلونجا، كاغيذا باخماييب، اوْنو الينيزده بۆكولو ساخلايين. هر نه آيدين مي؟»

خالق اوْ قدَر بوُ ايشي گؤرموشدو كي، گؤستَريشلره آلا ياريمچيق قوُلاق آسدي؛ اوْنلارين چوْخو ساكيت ايدي، دوْداقلاريني ايسلادير، هنده‌وَره باخميرديلار. سوْنرا ساميرز بَي بير اليني قالديريب «آدامز.» دئدي. بير كيشي تۆنلوكدن چيخيب ايره‌لي گلدي. «سالام، ايستيو،» ساميرز بَي دئدي، آدامز بَي ايسه «سالام، جوْ.» دئدي. اوْنلار گۆلونج بير شكيلده، عصبيجه‌سينه بيربيرينه ديش آغارتديلار. سوْنرا آدامز بَي قارا قوُتونون يانينا گئديب، بۆكولو بير كاغيذ ائشييه چكدي. تلَم ـ تله‌سيك قاييديب تۆنلويون ايچينده‌كي عاييله‌سيندن بير آز آرالي اوْلان يئرينه گئدَركن، الينده‌كي كاغيذا باخماييب، اوْنو برك ـ برك سيخدي.

ساميرز بَي «آلن،» دئدي. «آنديرسوْن... بئنتام.»

آخير جرگه‌ده خانيم دئلاكروز خانيم قرئيوز'ه «منه ائله گلير كي، لاتاري'لر آراسيندا هئچ بير فاصيله يوْخدور. ائله بيل سوْنونجوسونو ائله كئچَن هفته باشيميزدان ائله‌ميشديك،» دئدي.

«زامان دوْغرودان دا تئز گئچير،» خانيم قرئيوز دئدي.

«كلارك... دئلاكروز.»

خانيم دئلاكروز «اوْدور، منيم اريم گئدير،» دئدي. اري قاباغا گئدَركن، قادين نفسيني ساخلادي.

ساميرز بَي «دانبار،» دئدي و قادينلاردان بيريسي «گئت، جاني،»، اوْ بيريسي ايسه «اوْدور، گئدير،» دئيه‌نده، خانيم دانبار سارسيلمازجا گئتدي.

خانيم قرئيوز «سيرا بيزده،» دئدي. اوْ، قرئيوز بَي قوُتونون يانينا گليب جيدّيتله ساميرز بَي'ي سالاملاييب، بير كاغيذ سئچَركن، اريني ايزله‌دي. ايندي، بۆتون تۆنلوك آراسيندا بؤيوك اللرينده بۆكولموش كيچيك كاغيذلار اوْلان، دؤنه ـ دؤنه اوْنلاري عصبي‌ليكله دؤندَرن كيشيلر وار ايدي. الينده كاغيذي ساخلايان خانيم دانبار، اوْغلانلارينين يانيندا دوُرموشدو.

«هاربرت... هاچينسوْن.»

خانيم هاچينسوْن «گئت اوْرا، بيل،» دئينجه هنده‌وَرينده‌كيلر گۆلوشدولر.

«جوْنز.»

آدامز بَي يانيندا دايانان اوْلد من وارنير'ا «دئييرلر، قوزئي كندده لاتاري'ني بوُراخماقدان سؤز گئدير.» دئدي.

اوْلد من وارنير فينخيريب، «سفئه گئده‌لر،» دئدي. «ائله جاوانلارين سؤزونه اوُيورلار كي، هئچ زاد اوْنلاري راضي سالمير. بيليرسن، سوْنرا دا كؤهوللرده ياشاماغا قاييتماق ايسته‌يه‌جكلر، داها كيمسه ايشله‌مه‌يه‌جك، بير مۆدّت بئله ياشاياجاقلار. بير آتالار سؤزو وار، لاتاري اييوُن‌'دا، مكه‌لرين يئتشيدی‌یي زامان. بئله گئدَرسه، هاميميز سوُدا پيشيريلميش آلاق اوْتويلا پاليد قوْزاسي يئمه‌لي اوْلاجاغيق. هميشه بير لاتاري اوْلوبدور،» دئیه حؤوصله‌سيزجه آرتيردي. «بوُ گنج جوْ ساميرز'ين اوْردا هر كيمسه ايله ميرتلاشماسيني گؤرمك ائله يئتَرينجه پيس‌دير.»

خانيم آدامز «بعضي يئرلرده، آرتيق، لاتاري'لري بوُراخيبلار،» دئدي.

«بدبختليكدن باشقا هئچ زاد يوْخ اوْندا،» اوْلد من وارنير جسارتله دئدي. «سفئه گئده‌لر.»

«مارتين.» بابي مارتين آتاسي‌نين ايره‌لي گئتمه‌سيني ايزله‌دي. «اوْويردايك... پيرسي.»

خانيم دانبار بؤيوك اوْغلونا «تئز اوْلسالارا،» دئدي. «تئز اوْلسالارا.»

«آز قاليب قوُرتارسين،» دئدي اوْغلو.

خانيم دانبار «آتانا قاچيب دئمه‌يه حاضير اوْل،» دئدي.

ساميرز بَي اؤز آديني چاغيردي، سوْنرا بير آدديم ايره‌لي آتيب، قوُتودان بير كاغيذ سئچدي. اوْندان سوْنرا «وارنير،» سسلَندي.

اوْلد من وارنير، تۆنلوك آراسيندان گئچه‌رك، «يئتميش يئددي ايل لاتاري'ده اوْلموشام،» دئدي. «يئتميش يئددي يوْل.»

«واتسوْن.» اوُجا اوْغلان، ال ـ آياغي بيربيرينه دوْلاشاراق، جاماعاتين آراسيندان گئچدي. بيري «سينيرلي اوْلما، جك،» دئدي، ساميرز بَي  ايسه«تلَسمه، اوْغلوم،» دئدي.

«زانيني.»

 اوْندان سوْنرا ساميرز بَي، اؤز كاغيذيني هاوايا قالديريب، «چوْخ ياخشي، دوْستلار،» دئيه‌نه‌جن آرایا اوُزون و گريليملي بير دوُروخما چؤكدو. بير دقيقه اوُزونو كيمسه قیمیلدامادی، سوْنرا ايسه كاغيذلاري آچيلديلار. بيردن بۆتون قادينلار عئيني زاماندا «اوْ كيم‌دير؟» «اوْنو كيم گؤتوروب؟» «دانبار'گيل‌دير‌ مي؟» «واتسوْن'گيل‌دير‌ مي؟» دانيشماغا باشلاديلار. سوْنرا سسلر «اوْ هاچينسوْن'دور. اوْ بيل'دير،» «بيل هاچينسوْن اوْنو گؤتوروب،» دئمه‌يه باشلادي.

خانيم دانبار بؤيوك اوْغلونا «گئت آتانا دئ،» دئدي.

خالق هاچينسوْن'گيلي گؤرمك اۆچون هنده‌وَره باخينماغا باشلادي. بيل هاچينسوْن سس‌سيز دايانميشدي و برَلميش گؤزلرله الينده‌كي كاغيذا باخيردي. بيردن تئسي هاچينسوْن «سن اوْنا، ايسته‌دی‌یي كاغيذي گؤتورمك اۆچون يئترينجه فۆرصت وئرمه‌دين. گؤردوم. بوُ اينصافدان دئييل.» دئيه ساميرز بَي'ين باشينا قيشقيردي.

«ياخشي قيز اوْل، تئسي،» خانيم دئلاكروز سسلَندي، خانيم قرئيوز ايسه «بيزه ده ائله اوْ قدَر فۆرصت وئريلدي،» دئدي.

«كس سسيیي، تئسي،» بيل هاچينسوْن دئدي.

«ياخشي،» ساميرز بَي دئدي، «بوُراجان ايش چوْخ تئز گؤرولدو، ايندي ايسه هر شئيي واختيندا بيتيرمك اۆچون بير آز تلَسمه‌لي‌ييك.» اوْ بيري ليسته باخدي. «بيل، سن هاچينسوْن عاييله‌سي آدينا گؤتوردون. هاچينسوْن'گيلده باشقا كيمسه وار ‌مي؟» دئدي.

خانيم هاچينسوْن «دوْن و ائوا وار،» دئيه چيغيردي. «اوْنلارا دا شانس وئرين!»

ساميرز بَي يوُمشاقجا، «قيزلار ارلرينين عاييله‌سي ايله كاغيذ چكيرلر، تئسي،» دئدي. «باشقالاري كيمي سن ده بيليرسن.»

«بوُ اينصافدان دئييل،» دئدي تئسي.

بيل هاچينسوْن اوزونتويله «سانيرام باشقا كيمسه يوْخ، جوْ،» دئدي. «قيزيم ارينين عاييله‌سي ايله كاغيذ چكير، ائله دۆزو ده بوُدور. اوُشاقلاردان باشقا منيم عاييله‌م يوْخ.»

ساميرز بَي «اوْندا عاييله‌لر آدينا كاغيذ چكمك سنين بوْينونا دۆشور،» آچيقجا دئدي، «ائوده‌كيلر آدينا دا كاغيذ چكمك يئنه سنين بوْينووا دۆشور، ائله مي؟»

«ائله‌دير،» دئدي بيل هاچينسوْن.

ساميرز بَي «نئچه اوُشاغين وار، بيل؟» دئيه رسميجه سوْروشدو.

«اۆچ،» بيل هاچينسوْن دئدي. «بالا بيل، نانسي و بالا دئيو،  بير ده تئسي ايله من.»

«چوْخ ياخشي،» ساميرز بَي دئدي. «هاري، اوْنلارين بيلئتلريني گئري آلدين مي؟»

قرئيوز بَي باشيني ترپَده‌رك بلي دئييب، كاغيذلاري يوُخاري قالديردي. ساميرز بَي «اوْندا، اوْنلاري قوُتويا قوْي،» دئيه بوُیروق وئردی. «بيل'ينكيلري ده آل قوْي اوْرا.»

خانيم هاچينسوْن، اوْلدوقجا ياواش سسله «منه ائله گلير كي، اوْنو باشدان باشلامالي‌ييق.» دئدي. «دئديم ده، دۆز دئييلدي. اوْنا يئترينجه واخت وئرمه‌دينيز، هامي گؤردو.»

قرئيوز بَي بئش كاغيذ سئچيب قوُتويا قوْيموشدو، باشقا كاغيذلاري ايسه يئره آتدي و يئل اوْنلاري گؤتوروب آپاردي.

خانيم هاچينسوْن هنده‌وَرينده‌كي خالقا «هامي دينله‌سين،» دئييردي.

ساميرز بَي «حاضيرسان مي، بيل؟» دئيه سوْروشدو و آروادي ايله اوُشاقلارينا گؤز اوُجو باخان بيل هاچينسوْن باشيني ترپَتدي.

ساميرز بَي «يادينيزدا قالسین،» دئدي، «كاغيذلاري گؤتورون و هره بيريني گؤتورنه‌جن بۆكولو ساخلايين. هاري،‌ بالاجا دئيو'ه يارديم ائت.» قرئيوز بَي، اؤز گؤيلو ايله اوْنونلا قوُتويا ساري گلَن بالاجا اوْغلانين اليندن ياپيشدي. ساميرز بَي «كاغيذي قوُتودان ائشييه چك، دئيوي،» دئدي. دئيوي اليني قوُتونون ايچينه ساليب گۆلدو. «يالنيز بير كاغيذ گؤتور،» ساميرز بَي دئدي. «هاري، سن بوُنو اوْنون اۆچون ساخلا.» قرئيوز بَي، يانيندا دوُروب تعجّۆبله اوْنا باخان اوُشاغين اليندن توُتوب، كاغيذي اوْنون برك يوُمروغوندان چيخارديب ساخلادي.

«سيرا نانسي'دا،» دئدي ساميرز بَي. نانسي'نين اوْن ايكي ياشي وار ايدي. اته‌ييني يئلله‌ده‌رك ايره‌لي گئديب اينجه‌ليكله قوُتودان بير كاغيذ گؤتورَ‌نده، مكتب يوْلداشلاري آغير بير نفس چكديلر. ساميرز بَي «بالا بيل،» دئدي و اۆزو قيرميزي و يئكه آياقلي بيلي، كاغيذي ائشييه چكَنده آزقالا قوُتونو چئويرميشدي. سامرز بَي «تئسي،» دئدي. تئسي بير آن دوُروخدو، ادبسيزجه اطرافا باخيندي، سوْنرا دوْداقلاريني برك سيخيب قوُتويا ساري گئتدي. بير كاغيذ قارمالاييب آرخاسيندا ساخلادي. 

جاماعات ساكيت ايدي. بير قيز «اوُمود ائديرم نانسي دئييل،» دئيه پيچيلدادي و پيچيلتي سسي تۆنلويون هر يئرينه ياييلدي.

اوْلد من وارنير اوُجادان «قديمكي كيمي دئييل،» دئدي، «خالق قديمكي كيمي دئييل.»

«چوْخ ياخشي،» دئدي ساميرز بَي. «كاغيذلاري آچين. هاري، بالاجا دئيو'ينكيني آچ!»

قرئيوز بَي كاغيذي آچيب هاوايا قالديرديغيندا، كاغيذين آغ اوْلدوغونو گؤرَن جاماعات بيردن كؤكس اؤتوردو. نانسي و بالاجا بيل عئيني زاماندا اؤزلرينینكيني آچديلار. ايكيسي ده خالقا دوْغرو دؤنوب، كاغيذلاريني باشلاري اۆسته قالديريب گۆلدولر.

ساميرز بَي «تئسي،» دئيه‌نده بير دوُروخما اوْلدو. سوْنرا ساميرز بَي بيل هاچينسوْن'ا باخدي، بيل كاغيذيني آچيب گؤستَردي. كاغيذ آغ ايدي.

ساميرز بَي «اوْ، تئسي'دير.» دئدي، سسي سوُسدو. «اوْنون كاغيذيني بيزه گؤستَر، بيل.»

بيل هاچينسوْن آروادينا ساري گئديب كاغيذي زوْرلا اوْنون اليندن چكيب چيخارتدي. كاغيذين اۆستونده دۆنَن گئجه ساميرز بَي داش كؤمور شيركتي‌نين دفترينده قارانداشلا قوْيدوغو قارا خال وار ايدي؛. بيل هاچينسوْن اوْنو قالديردي و جاماعاتين آراسينا بير چاخناشما دۆشدو.

ساميرز بَي «ياخشي، یوْلداشلار،» دئدي، «گلين تئز قوُرتاراق.»

كندليلرين، گله‌نه‌يي اوُنودوب اصل قوُتونو ايتيرديكلرينه باخماياراق، هله ده داشلاردان ایستیفاده ائتمه‌يی خاطيرلاييرديلار. اوُشاقلارين قاباقجادان دۆزَلتديكلري داش توْپاسي حاضير ايدي؛ يئرده داش وار ايدي، بير ده قوُتودان ائشييه تؤكولموش يئلله‌نن كاغيذ پارچالاري. خانيم دئلاكروز، ايكي الي‌يله آنجاق گؤتوره بيله‌جه‌يي بؤيوك بير داشي سئچيب، خانيم دانبار'ا ساري دؤنه‌رك «هاي گله!» دئدي، «تئز اوْل!»

خانيم دانبار'ين ايكي الينده ده بالاجا داشلار وار ايدي. تؤوشويه‌رك «داها قاچا بيلميرم. سن گئت قاباغا، من گليب سنه چاتارام.» دئدي.

اوُشاقلارين چوْخوندا داش وار ايدي و بيري بالاجا دئيو'ه بير نئچه چينقيل وئردي.

ايندي، تئسي هاچينسوْن آچيق‌ليغين اوْرتاسيندايدي. كندليلر اوْنا ساري ايره‌ليله‌ديكده اللريني اوُمودسوزجا اوُزاتدي. «بوُ اينصافدان دئييل،» دئدي. باشينا بير داش دَيدي.

اوْلد من وارنير «هه، گلين، گلين، هامي.» دئييردي. ايستيو آدامز يانينداكي خانيم قرئيوز ايله تۆنلويون اؤنونده‌يدي.

خانيم هاچينسوْن «بوُ اينصافدان دئييل، بوُ دۆز دئييل،» دئيه اوُجادان چيغيردي. جاماعاتسا اوْنون باشينا تؤكولوشدو .