یاغیشداکی پیشیک

 

✍ائرنئست هئمینقوئی 

تؤرکجه‌سی: کۆیولو نجاری سعید

هوْتئلده یالنیز ایکی آمئریکالی قالیردی. اوْتاقلارینا گئدیب-گلَرکن پیلله‌لرده قارشیلاشدیقلاری اینسانلارین هئچ بیرینی تانیمیردیلار. اوْتاقلاری ایکینجی مرتبه‌ده، دنیزه باخان طرفده‌یدی. اوْتاق ائل باغینا و ساواش آبیده‌سینه ده باخیردی. باغدا ایری خۇرما آغاجلاری و یاشیل ائنلی اوْتوراجاقلار وار ایدی.

هاوا یاخشی اوْلاندا همیشه اوْرادا قؽچلی تابلو ایله بیر رسّام اوْلوردو. رسّاملار خۇرمالارین نئجه بؤیودویونو و باغلارا، دنیزه باخان هوْتئللرین پارلاق بوْیالارینی خوْشلاییردیلار.
ایتالیالیلار ساواش آبیده‌سینه باخماق اۆچون اۇزاقدان گلیردیلر. آبیده بۆرونجدن ایدی و یاغیشدا پاریلداییردی. یاغیش یاغیردی. خۇرما آغاجلاریندان یاغیش دامجیلاییردی. چؽنقیللی جؽغیرلاردا سۇ گؤلمه‌چه‌لر اوْلوشدورموشدو. دنیز یاغیشدا اۇزون بیر خط‌له ساحیله چؽرپیلیب داغیلیردی، سوْنرا یئنیدن یاغیشدا عینی اۇزون خط‌له قاباریب چؽرپیلماق اۆچون ساحیله دوْغرو سۆروشوردو. ماشینلار ساواش آبیده‌سی‌نین یانینداکی مئیداندان چؽخیب گئتمیشدی. مئیدانین اوْ بیری طرفینده، کافه‌نین قاپی‌سیندا بیر قارسون دایانمیش، بوْش مئیدانا باخیردی.

آمئریکالی قادین پنجره‌دن چؤله باخیردی. ائشیکده پنجره‌نین دۆز آلتیندا، سۇیو سۆزولن یاشیل ماسالارین بیری‌نین آلتیندا بیر پیشیک بۆزوشوب اوْتورموشدو. اۆست-باشینا سۇ دامماسین دئیه پیشیک اوْلدوقجا یؽغجام اوْتورماغا چالیشیردی.

«پیشی‌یی گتیرمه‌یه گئدیرم،» دئدی آمئریکالی قادین.

«من گتیره‌رم،» دئیه اری یاتاقدان دیلَلندی.

«یوْخ، اؤزوم گتیره‌رم. یازیق پیشیک ماسانین آلتیندا ایسلانماماغا چالیشیر.»

اری یاتاغین اته‌ینده‌کی ایکی یاستیغا سؤیکه‌نه‌رک اوْخوماغا داوام ائتدی.

«ایسلانمایاسان،» دئدی کیشی.

قادین آشاغی ائندی. اوْفیسین یانیندان گئچرکن هوْتئل یییه‌سی آیاغا قالخیب اوْنا باش اَیدی. اوْنون ماساسی اوْفیسین اوْ بیری اۇجوندایدی. اۇزون‌بوْیلو، یاشلی بیر کیشی‌یدی.
«یاغیش یاغیر،» دئدی قادین. هوْتئل یییه‌سی اوْنون خوْشونا گلیردی.

«بلی، بلی، سینیورا، پیس هاوادیر.»

کیشی قارانلیق اوْتاغین اۇزاق اۇجونداکی ماساسی‌نین آرخاسیندا دایانمیشدی. قادین اوْنو خوْشلاییردی. کیشی‌نین هر هانسی بیر شیکایته برک جیدّیلیکله یاناشماسی قادینین خوْشونا گلیردی. اوْنون ویقارینی خوْشلاییردی. کیشی‌نین اوْنا قۇللوق ائتمه بیچیمینی بَیه‌نیردی. اوْنون هوْتئلچی اوْلماق حاققینداکی حیسلرینی بَیه‌نیردی. اوْنون یاشلی، آغیر اۆزو و ایری اللری قادینین خوْشونا گلیردی.
قادین اوْنو بَیه‌نه‌رک قاپینی آچیب ائشییه باخدی. یاغیش داها دا گۆجلَنمیشدی. رئزین یاغمولوقلو بیر کیشی بوْش مئیداندان سوْوُوشاراق کافه‌یه گئدیردی. پیشیک ساغ طرفده اوْلاجاقدی. دامین آلتینا دا گیرمیش اوْلا بیلردی. قاپیدا دایانینجا آرخاسیندا بیر چتیر آچیلدی. اوْتاقلارینا باخان قۇللوقچویدو.

ایتالیانجا دانیشاراق. «ایسلانمایین،» دئیه گۆلومسه‌دی. البته، اوْنو اوْتئل یییه‌سی گؤندَرمیشدی.
قۇللوقچو چتیری قادینین باشینا تۇتاراق چؽنقیللی جؽغیرلا پنجره‌نین آلتینا قدَر گئتدی. یاغیشدان پارلاق یاشیلا بوْیانان ماسا اوْرادایدی، اما پیشیک گئتمیشدی. قادین بیردن خیال قؽریق‌لیغینا اۇغرادی. قۇللوقچو باشینی قالدیریب اوْنا باخدی.

«نه‌سه ایتیرمیسینیز، خانیم؟»

«بیر پیشیک وار ایدی.» دئدی آمئریکالی قادین.

«پیشیک؟»

«هه، پیشیک.»

«پیشیک؟» قۇللوقچو گۆلدو. «یاغیشدا پیشیک؟»

«هه،» دئدی قادین، «ماسانین آلتیندا. هئی، اوْنو چوْخ ایسته‌ییردیم. بیر پیشیک بالاسی ایسته‌ییردیم.»

قادین اینگیلیسجه دانیشاندا قۇللوقچونون صیفتی گریلیردی.

«گل، سینیورا،» دئدی. «ایچری قاییتمالی‌ییق. سن ایسلاناجاقسان.»

«دئیه‌سن،» دئدی آمئریکالی قادین.

اوْنلار چؽنقیللی جؽغیرلا گئری قاییدیب قاپیدان ایچه‌ری گیردیلر. قۇللوقچو قادین چتیری باغلاماق اۆچون ائشیکده قالدی.

آمئریکالی قؽز اوْفیسین یانیندان گئچَرکن هوْتئل یییه‌سی ماساسیندان اوْنا باش اَیدی. قادینین ایچینده نه‌سه چوْخ کیچیک و سؽخیلمیش بیر حیسّ یاراندی. هوْتئل یییه‌سی قادیندا چوْخ کیچیک و عئینی زاماندا گئرچکدن اؤنَملی بیری اوْلدوغو حیسّینی اوْیاتدی. بیر آنلیق اؤزونو سوْن درجه اؤنملی حیسّ ائتدی. پیلله‌لردن یۇخاری قالخدی. اوْتاغین قاپی‌سینی آچدی. جوْرج یاتاقدایدی، کیتاب اوْخویوردو.

«پیشی‌یی تۇتدون؟» دئیه کیتابی یئره قوْیاراق سوْروشدو.

«گئتمیشدی.»

گؤزلرینی اوْخوماقدان چکه‌رک، «گؤره‌سن، هارا گئتدی،» دئدی.

قادین یاتاقدا اوْتوردو.

«اوْنو چوْخ ایسته‌ییردیم،» دئدی. «نییه بوُ قدَر ایسته‌دی‌ییمی بیلمیرم. اوْ یازیق پیشیک بالاسینی ایسته‌ییردیم. یاغیش آلتیندا یازیق پیشیک بالاسی اوْلماق هئچ ده خوْش دئییل.»

جوْرج یئنیدن کیتاب اوْخوماغا باشلادی.

قادین گئدیب گۆزگونون قارشی‌سیندا اوْتوروب ال گۆزگوسو ایله اؤزونه باخدی. اۆزونو یاندان اینجه‌له‌دی، اؤنجه بیر طرفینی، سوْنرا دا اوْ بیری طرفینی. سوْنرا باشی‌نین آرخاسینا و بوْینونا باخدی.

اوْ یئنیدن یاندان اؤزونه باخاراق، «ساچیمی اۇزاتسام، یاخشی اوْلماز مؽ؟» دئیه سوْروشدو.

جوْرج باشینی قالدیریب اوْنون اوْغلان اۇشاغی کیمی کسیلمیش بوْینونون آرخاسینی گؤردو.

«اوْلدوغو کیمی خوْشوما گلیر.»

«بۇندان چوْخ بئزمیشم،» دئدی. «اوْغلان کیمی گؤرونمکدن چوْخ بئزمیشم.»

جوْرج یاتاقداکی یئرینی دَییشدی. قادین دانیشماغا باشلایاندان بری جوْرج گؤزلرینی اوْندان آییرمامیشدی.

«چوْخ گؤزل گؤرونورسن،» دئدی کیشی.

گۆزگونو ایشکافین اۆستونه قوْیدو، پنجره‌یه ساری گئدیب ائشییه باخدی. هاوا قارالیردی.

«ساچلاریمی برک و دۆز بیر شکیلده گئری‌یه ساری چکیب آرخادا حیس ائله‌یه بیله‌جه‌ییم بؤیوک بیر دۆگون دۆزَلتمک ایسته‌ییرم.» دئدی قادین. «قۇجاغیمدا اوْتوران، سؽغاللایانداسا مؽریلدایان بیر پیشیک بالاسی ایسته‌ییرم.»

«هه؟» جوْرج یاتاقدان دئدی.

«بیر ده اؤز گۆموش قاب-قاجاغیم‌لا بیر ماسادا یئمک یئمک و بیر نئچه شام ایسته‌ییرم. یاز اوْلسون ایسته‌ییرم، ساچلاریمی گۆزگو قارشی‌سیندا داراماق ایسته‌ییرم، بیر پیشیک بالاسی و یئنی پالتارلار ایسته‌ییرم.»

«اَه، سۇس، اوْخوماغا نه‌سه تاپ،» دئدی جوْرج. یئنه اوْخوماغا باشلادی.

قادین پنجره‌دن ائشییه باخیردی. آرتیق هاوا بۆس‌بوتون قارالمیشدی و هله ده خۇرما آغاجلارینا یاغیش یاغیردی.

«نه اوْلور اوْلسون، من پیشیک ایسته‌ییرم،» دئدی. «ایندی پیشیک ایسته‌ییرم. اۇزون ساچیم یا دا اَیلَنجه‌م اوْلمایاجاقسا، هئچ اوْلماسا پیشی‌ییم اوْلسون.»

جوْرج اوْنو دینله‌میردی. کیتاب اوْخویوردو. قادین پنجره‌دن ائشییه، اؽشیغین یاندیغی مئیدانا باخدی.

کیمسه قاپینی دؤیدو.

«بۇیورون،" دئدی جوْرج. اوْ، کیتابیندان باشینی قالدیردی.

قاپیدا قۇللوچو دایانمیشدی. اوْ، بؤیوک، آلا-بۇلا پیشی‌یی دؤشونه باسمیش، قۇجاغیندا ترپه‌دیردی.

«باغیشلایین،» دئدی قۇللوقچو قادین، هوْتئل یییه‌سی مندن بۇنو سینیورایا گتیرمه‌ییمی ایسته‌دی.