بیر تئلفئون کارتی
خییاباندایام، سکی‌یله گئدیرم، هاوا سوْیوق‌دور، اۆره‌ییم ایستی بیر ایچه‌جک ایسته‌ییر. جیبیمی آختاریرام، بیر آز قارا پۇل، بیر آز کاغیذ پۇل، بیر ده بیر تئلئفون کارتی وار جیبیمده. اوْ کارتا باخیرام، یوْلدان گئچن بیری، «باغیشلایین! کارتینیزلا بیر بالاجا زنگ ائله‌یه بیله‌رم می؟» دئیه سوْروشور.
بیردن ایچیمده نه‌سه دَییشمه‌یه باشلاییر، باشیم
دؤنور، گؤزلریم قارالیر، اؤنومده قارماقاریشیق گؤرونتولر یئری‌ییر...
خییاباندا گئدیرم، آراز دا منیم‌له‌دیر، هاوا سوْیوق‌دور،
ایستی بیر ایچه‌جک دۆشور گؤیلوموزه. جیبلریمیزی آختاریریق، اوْنون جیبینده بیر آز
قارا پۇل وار، منیم جیبیمده ایسه بیر آز قارا، بیر آز دا کاغیذ پۇل وار، بیر ده
بیر تئلئفون کارتی. آخشام اۆستودور.
«چوْخدان‌دیر ائودن خبریم یوْخ، تئلئفون آچا
بیلمه‌میشم،» دئییر آراز.
«بیر گئت دَی.»
بیر چای ایچیریک. آرامیزدا سس‌سیزلیک وار. واخت
تاپاندا آراز'لا دردله‌شیریک.
«تبریز'ه گئتمه‌یه‌لی آلتی آی اوْلدو. اوْلمور،
اؤزون بیلیرسن کی؟» دئییر.
«هه، بیلیرم، ایشدن قوْووُلماق، ایش‌سیز قالماق
چوْخ چتین‌دیر.»
«ائوه بیر تئلئفون آچمالی‌یام،» دئییب منه باخیر.
من هئچ نه باشا دۆشمورم.
«کارتینی آلا بیله‌رم می؟»
کارتا باخیرام. بیر ایل اوْلموشدو اوْنون‌لا
دانیشالی، سوْن تئلئفون دانیشیغیمیز ایدی. هئچ خبریم
یوْخ اوْندان. منه چؽخ گئت دئمیشدی. کیمسه‌یه دئیه بیلمه‌میشدیم دردیمی، یالنیز،
بوُ کارت‌لا دردلشمیشدیم. اوْ بیلیردی اۆره‌ییمده‌کی آجی‌نین یاندیریجی‌لیغینی.
«آلو، سالام، نئجه‌سن؟» سئوینه-سئوینه دئییرم.
«آلو، سلام، وارام دا،» دئییر اوْ قؽز.
«نه ایش گؤرورسن؟»
«هئچ،... نه‌دن زنگ ائله‌دین؟»
«نئجه نه‌دن زنگ ائله‌دین؟! زنگ ائله‌مه‌مه‌لی‌یدیم
می؟!»
«یوْخ، منیم سن‌له هئچ بیر سؤزوم یوْخ.»
«آما منیم سن‌له سؤزوم وار. بیلیرسن کی، سنی‌ــ»
تئلئفوندان کسیک-کسیک سیقنال سسی گلیر. تئلئفونو
قاپادیب اوْ قؽز.
نئیله‌یه‌جه‌ییمی بیلمیرم. هر شئیین بیر گؤز
قؽرپیمیندا یوْخ اوْلماسینا اینانا بیلمیرم. من قالیرام، بیر ده کارت. کارتی
چؽخاردیرام تئلئفونون آغزیندان، جیبیمه قوْیورام.
«یئنی ایشه گئتسم، کارتین عوضینی قایتارارام،» دئییر
آراز.
سؽرادان بیر کارت اوْلسایدی، چوْخ راحت وئرردیم،
اما سیرداشیم اوْلموش بوُ کارتدان واز گئچمک چتین‌دیر. کارتا حسرت‌له باخیب وئریرم
اوْنا. بۇندان بئله کیمین‌له دردل‌شه‌جه‌ییمی بیلمیرم. آراز'ین سیرداشی اوْلاجاق
اوْ کارت.
«چوْخ ساغ اوْل.» دئییب سئوینه‌رک کارتی آلیر.
گؤزوم اوْ کارتدا قالیب. نه‌دنسه آراز'لا کارتی
بیر داها گؤره بیلمه‌یه‌جه‌ییمدن گیزلی بیر اۆشوتمه گئچیر اۆره‌ییمدن. آرامیزدا سس‌سیزلیک
وار.
خییاباندایام، ماشین قؽژیلتی‌یلا گئچیر اؤنومدن،
دیکسینیرم، یئریمدن آتیلارام...
«باغیشلایین! کارتینیزلا قؽسا بیر زنگ ائله‌یه بیله‌رم
می؟» بیر داها دیله گلیب دئییر اوْ کیشی. کارتی وئریرم اوْنا.
آراز'دان آیریلیرام. نئچه گۆن سوْنرا آراز'ین اؤلوم
خبری گلیر: ایشله‌مک اۆچون ایران’ین گۆنئیینده یئرله‌شن آدالاردان بیرینه قاییق‌لا
گئدرکن، فؽرتینانین قاییغی دئویردی‌یینی و اوْنون‌لا نئچه آیری ایشچی‌نین سۇدا
بوْغولدوغونو دئییرلر. آراز’ین جیبیندن بیر آز قارا پۇل، بیر ده بیر تئلئفون کارتی
وارمیش. آراز یئنی بیر ایش تاپدیغینی منه دئمیشدی، من ده سئوینمیشدیم.
اوْ گۆن، آراز، اوْ کارت یادیما دۆشور، منیم
گئدیب قایتمایان سیرداشلاریم...
یوْلا دۆزولورم. یوْلدان گئچن کیشی آرخادان، «عم‌اوْغلو، کارتینیز قالدی!» دئیه سسله‌نیز.
Comments
Post a Comment