ATASININ GƏZDİYİ AĞAC

 

Qurban'ın atası Əsgər də gəncliyində Nərgiz adlı bir qızı qaçırtmışdı. Qızı almışdı kürəyinə aparmışdı xalasıgilə. Yol boyu Nərgiz yumruqla döymüşdü oğlanın başına. Əsgər xalasıgilə çatanda, başı gicəlmişdi, yıxılmışdı otağa. Heç nədən xəbəri olmayan xalasının az qalmışdı ürəyi dayansın. Əsgər gözünü açanda, anasını, bacılarını, xalasıgili görmüşdü. Hamısının gözü yaşlıydı. Nə olduğunu soruşmuşdu. Siz kimsiz demişdi. Onların birdən ağlaşdığı onu lap çaşqınlığa salmışdı. Axşam olanda ağlı başına gəlmişdi, anasıgili, xalasıgili tanımışdı. Birdən Nərgiz yadına düşmüşdü, dik durub oturmuşdu. Nərgiz'in hara getdiyini soruşmuşdu. Xalası, Nərgiz'in qaçıb getdiyini demişdi. Ayağa durmaq istəmişdi, başı yenə gicəlib yerə sərilmişdi.

Neçə gün çəkmişdi özünə gəlməsi. Bir gün axşam üstü Əsgər bağdan evə tək gələndə, dəhnədə Nərgiz'in qardaşları onun qabağını kəsib, onu doyunca döymüşdülər. Aşa-aşa özünü bir təhər evə çatdırmışdı. Evdəkilər Əsgər'in üz-gözünü lala qan içində görəndə əl-haya qalmışdılar. Neçə gün çəkmişdi sağalması.

♣¿♣

Qurban dedi, “Nazlı'yla anlaşmışıq. Sabah günorta çağı məktəbdən gələndə qaçacağıq.”

Dedim, “bu daşı tök ətəyindən, ay Qurban. İndi daha qız qaçırtmaq zamanı deyil.”

"Yox, mən o qızı çox sevirəm. O da məni sevir, məsajlarında dönə-dönə mənə yazıb. Amma dədə-nənəsi razılıq vermir."

"Heç ailələriz də birbirinə yaraşmır."

"Yox, qaçırdacağam."

"Özün bilərsən!"

♣¿♣

Neçə gün Qurban'dan xəbər olmadı. Onu görmək üçün evlərinə getdim. Qurban evdə yorğan-döşək içindəydi.

Atası oturmuşdu, papruz çəkirdi. Anasının yarası, məni görcək, deşildi.

"Gör oğlumu nə günə qoyublar."

Qurban'ın üz-gözü göyərmişdi.

"Nə oldu, bə, Qurban?!"

"Heç zad, qızı qaçırdacağım gün, birdən qız qaçmaqdan vaz geçdi. Hay dilə tutdum gəl qaçaq, qulaq asmadı. Mən də zorla qolundan yapışıb maşına mindirmək istədim. O sırada qızın qardaşı ilə ayrı bir oğlan bilmirəm birdən hardan tapıldılar, töküldülər başıma. Məni bu günə saldılar. Qız da qaçıb getdi."

Qurban'ın bu sözlərini eşidən atası, sağ qolunu çırmalayıb, Qurban'a əyri-əyri baxa-baxa birdən partladı:

"Bir mənim qoluma bax."

Qolunda yara yeri var idi. Qurban atasına çaş-baş baxdı.

"Ay külbaş, mən də o qızın bibisini qaçırtmışdım!"