قونشوموز

 

بيزيمله عئيني قاتدا اولان قارشي آپارتمانداکي قونشو ار-آروادي چوخدان گؤرمک ايستيرديم. گئجه ياريسي سؤيوش-ساواشا باشلاييرديلار، ساعات اوچده-دؤردده شاپپيلتي، تپيک-دؤيوش، سونرا دا قادينين آغلاماسي ايله وئريليشلري سونا چاتيردي. هر گئجه بيز، بيليت‌سيز راديو وئريليشينه قوناقديق! دوققوز آي ايدي ياخشي ياتا بيلمه‌ميشديک. ياي دوشه‌لي ده، ساعات بئش هنده‌وَرينده ائيوانا آسديقلاري قفسده‌کي بير جوت بولبول اؤتوشمه‌يه باشلاييردي. ائله اوخوشوردولار کي، دئييرديم ائله ايندي بوغازلاري جيريلاجاق.

دونن اونلاري ائشيکده گؤردوم: آلچاق بويلو، قاش‌قاباقلي بير کيشي، اورتا بويلو، بير آز گؤزل بير قادين.

گولومسونه-گولومسونه، «آي قونشو، گئجه داوا-دالاشيزين سسي قويمور ياتاق، بلکه بير آز آلچاق ساواشاسيز، يا پنجره‌ني اؤرتوب ساواشاسيز. يا دا، هئچ اولماسا، سؤيوش-ساواشيزي ايلک آخشامدان باشلاييب، گئجه ياري‌سينا قورتاراسيز،» دئديم.

«سنه نه؟! اؤز ائويم‌دي، اؤزوم بيللم!» دئييب يومروغونو منه ساري چکدي. آروادي اونون قولوندان توتدو.

سؤزومدن واز گئچيب، سوووشوب ائوه گلديم.

هئچ اولماسا، قفسده‌کي بولبوللري ياخيندان گؤره بيلسه‌يديم، دئيرديم:

«آخي، سحر-سحر، اؤزو ده قفسده، بئله آداملار اوچون نئجه اوخوماغيز گلير؟!»

Comments

Post a Comment

Popular posts from this blog

تانیش یاد

کافه تۆنلوک‌دور، بوْش ماسا آختاریرام، بۆتون ماسالار دوْلودور. گؤز گزدیریرم، کافه‌نین بۇجاغیندا ، یاری سی شۆشه‌دن اوْلان دوُوارین یانیندا ایکی آداملیق ماسادا بیر قؽز تک اوْتوروب. ماسالارین آراسیندان سوْووُشوب اوْنا ساری گئتمه‌یه باشلاییرام. ماسالاردان دئییب گۆلمک سسی، قهوه-چای و سیقارئت اییی گلیر، کافه‌نین آتموسفئرینی غریبه بیر ترکیب بۆرویوب، قوْخولو سسلر یا دا سسلی قوْخولار!  «بۇرا بوْش مۇ، یوْخسا گؤزله‌دی‌یینیز بیرینین یئری‌دیر؟» دئیه قؽزدان سوْروشورام . قؽز ائشیتمیر. دایانیب اوْنا باخیرام، دالغین گؤرونور، ال تئلئفونونا دالمیش، دئیه‌سن. باشیندا قیرمیزی شال وار، قارا ساچلاری شالین آلتیندان چیخیب اۆزونه و چیینینه تؤکولوب . قیزدان جاواب گلمه‌دی‌یینه گؤره قاییدیب کافه‌دن چؽخیب گئتمک ایسته‌ییرم، دالدان بیر سس ائشیدیرم . «ایسته‌سه‌نیز، اوْتورا بیلرسینیز.» قاییدیرام، قیز منه باخیر، دوْداغیندا سوْلغون بیر گۆلومسه‌مه وار . «اوْتورون، من تکَم.» قیزین قاباغیندا بیر فینجان قهوه وار، بیر آز اوْ یانلیقدا بوْش بیر کۆل‌قابی وار . «سیز ده تک‌سینیز؟!» دئیه سوْروشور مندن . «هه، بۇ...
Read more

اوْلوم‌لا اؤلوم آراسی

اوْغلان آیاغا قالخدی، گؤزونه گؤرونن قارالتی‌نین قارشی‌سیندا دایاندی . «نئجه اوْلور اوْلسون، من بوُ ایشی بیتیره‌جه‌یم، سندن آیریلاجاغام!» بیر آز گؤزله‌دی، قارشی‌سینداکی قارالتی هئچ نه دئمه‌دی . «هه، دئیه‌سن، دئمه‌یه سؤزون یوْخ! اؤزون ده سۇچلو اوْلدوغونو مندن داها یاخشی بیلیرسن.» پنجره‌نین آرخاسینا گئچدی، ائشییه باخدی، قارانلیق ایدی، کۆچه‌ده یالنیز پاخلا-چۇغوندور ساتان کیشی وار ایدی، هامی ائوینه چکیلمیشدی. بیر سیقارئت آلیشدیردی، دریندن سوْموروب تۆستوسونو هیرس‌له پنجره‌نین شۆشه‌سینه پیله‌دی، تۆستو شۆشه‌یه دییب اوْنون اۆزونه ساری قاییتدی، پنجره اوْغلانین بوُ ایشینی جاوابسیز قوْیماق ایسته‌مه‌دی . کۆچه‌ده‌کی پاخلا-چۇغوندور ساتان یاشلی کیشی‌نین یانیندا چۇغوندور یئمه‌یی چوْخ ایسته‌ییردی، آنجاق ایندی‌یه‌جن گئدیب یئمه‌میشدی، کئفی‌نین کؤک اوْلدوغو گۆنو گؤزله‌ییردی. بوُ سوْن آیلاردا داریخماسی لاپ چوْخالمیشدی، بۆتون ایشلرینی یاریم‌چیق گؤروردو، حتا نئچه دؤنه درسی ده یاریم قوْیوب بیلیم‌یوردونو بۇراخماغی دۆشونموشدو، آنجاق آتا-آناسیندان چکیندی‌یینه گؤره بوُ ایشدن هله‌لیک واز گئچمیشدی. یاخ...
Read more