گئچیجی سئوگیلی
گئچيجي سئوگيلي اولماق‌دير ايشيم. شوکورلر
اولسون، قارنيمي دويورورام، بير آز دا خرجليک قازانيرام. بلکه، «گئچيجي سئوگيلي»نين
نه اولدوغونو سوروشاسينيز. بئله آچيقلاييم:
هر بير سببدن دولايي بير قيز، سئوگيلي‌سيندن آيريلا بيلر. يا اوغلان بوراخيب گئدر، يا دا قيز اونو آتار. بئله دوروملاردا، عوموميتله، ايکي طرفين ايکيسي، يا دا ان آزيندان بيري روحي سارسينتي گئچيرر. اوندا، سئوگيده يئنيلميش حيسيني ياشايان کيمسه‌نين بير سيرداشا، دردداشا احتياجي اولار. اونو آنلايان، سؤزونو دينله‌ين، آتيب گئدن، پيس‌ليک ائدن اسکی سئوگيليني قيناماغا اورتاق اولا بيلن بيريني آختارار. قيز يئني بير اوغلان آختارار، اوغلانسا يئني بير قيز. من ده بئله حاللاري گؤروب، سئوگي ماجراسي اوغورسوز بيتن قيزلارين يانيندا اولماغا قرار وئرميشم.
ياشاديغيميز توپلومون ايچينده بو ماجرالار چوخ
سيخ باش وئرير. همن-همن گونده بو شهرده بلکه اونلارجا سئوگيلي بيربيريندن آيريلير.
اونا گؤر، دئمک اولار، اليم هئچ بوش قالمير. البته ايشيمي يئنيلميش سئوگيليلره
تانيتديرماق اوچون، گرَکلي ايشلري گؤرورم. سانال دونيادا، ايجتيماعي شبکه‌لرده،
اليمدن گلديکجه، گئنيش رئکلاملاما ايشي آپاريرام.
بلکه بو ايشه نئجه گلديیيمي سوروشان اولسون.
اونلاري بئله بيلگيلنديره بيله‌رم:
يیرمي ايل اؤنجه، يئني‌يئتمه‌ليکدن گنج‌ليیيمه
آدديم آتديغيمدا ايلک جيدي سئوگي ماجرامي ياشاديم. البته اوندان اؤنجه، مکتب
دؤورونده آتامين يولداشي قيزيندان بير آز خوشوم گلَردي، آما آراميزدا سئوگي اولمادي.
آنجاق بيليم‌يوردوندا اؤيرَنجي ايکن، بير قيزلا قارشيلاشديم. ساريشين ايدي، آلا
گؤزلري وار ايدي. سانيرام اونا تاي بيريني بير-ايکي دؤنه يوخودا گؤرموشدوم. گؤزومو
توتدو. اونا بير تهَر ياخينلاشمايا چاليشديم. آنجاق چوخ آلينمادي. تکجه گونده‌ليک
سالاملاشما حدينه گليب چاتدي. بو ايسه مني هئچ راضي سالميردي. بير گون اونو باهالي
بير ماشيندان ائنرکن گؤردوم. سوروجونون يانيندان ائنيب، آغلايا-آغلايا ماشيندان
اوزاقلاشدي. آرخادان باخيرديم. سوروجو بير کيشي ايدي، بير آز دايانيب، سونرا قازا
باسيب گئتدی.
او گوندن سونرا قيزي بير هفته کيمي بيليم‌يوردوندا
گؤرمه‌ديم. فاکولته‌لرينه گئتديم، اولا بيله‌جه‌یي يئرلري آختارديم، آما اونو تاپا
بيلمه‌ديم. گلن هفته‌سي اونو سحر چاغي يئمک‌خانادان چيخارکن گؤردوم. اوست-باشي،
اوز-گؤزو بير آز دَييشميشدي. گؤزلري بير آز شيشميش گؤرونوردو، بنيزي ده آغارميشدي.
سالاملاشديق، سوووشوب گئتدی.
بير نئچه گون سونرا بيليم‌يوردونون توشونداکي
خيياواندا اونونلا بير کيتابچي توکانيندا قارشيلاشديم. بو کز بير آز داها ايستي
سالاملاشديق. هله ده اوز-گؤزونده بيتکين‌ليک ايزلري وار ايدي. درسلردن، بيليم‌يوردوندان،
هاوادان-سودان دانيشديق. کيتابچيدان ائشييه چيخيب، خيياواندا يئريمه‌يه باشلاديق.
اونا بيرليکده نه‌سه ايچمه‌یي تکليف ائتمه‌يه اورَکلنديم. بو فيکري بير نئچه يول بئينيمده
دولانديرديم، اؤنجه يوخ دئيه‌جه‌یيندن، پيس داوراناجاغيندان قورخدوم، سونرا اونون
منله هئچ بيرليکده اولماديغي گلدي گئچدي فيکريمدن. اونو قازانماق اوچون اودوزماق
ريسکيني ده گؤزه آلماغين گرَکديیيني دوشوندوم. درين بير نفس آليب دئديم:
«بيرليکده نه‌سه ايچمه‌يه نه دئيرسينيز؟! قهوه‌دن،
مئيوه سويوندان؟!»
منه بير باخيب گولومسوندو.
«زحمت اولار.»
«نه زحمتي!!» دئييب سئوينه‌رک اونا باخديم.
«بلکه بيرليکده بير قهوه ايچک،» دئييب يئنيدن
گولومسوندو.
ايسته‌ديیيم اولموشدو.
«اولار! اولار! بويورون!» دئييب اليمله اونا يولو
گؤستَرديم.
کافه‌ده قهوه ايچه-ايچه اونا باخديم. او دا منه
باخدي. ايکينجي ريسکين دوز زاماني‌يدی.
«سيز... سيز بير آز توتقون گؤرونورسونوز!» دئييب
باخديم.
قيزدان سس چيخمادي. اوزونه آغلامسينماق چؤکدو.
هيققيلدادي.
«سيزي اينجيتديمسه، باغيشلايين،» دئييب، بير
کاغيذ دسمال گؤتوروب اونا وئرديم.
دسمالي آليب، ياناغينداکي بير-ايکي داملا ياشي سيليب
آغزينين قاباغينا توتدو. نه ظولومله ده اولسايدي، آغلاماغيني دوردوردو.
«يوخ، سيز پيس بير ايش گؤرمه‌دينيز،» دئييب بير
آز گولومسونمه‌يه چاليشدی.
«دانيشماق ايسته‌سه‌نيز، من ياخشي دينله‌یيجي
اولا بيله‌رم،» دئييب بالاجا بير گولوش آتديم.
«چوخ ساغ اولون،» دئييب سوسدو.
اوزونون بيچيميندن او گون بوندان داها چوخ
دانيشماياجاغيني آنلاديم. داها او حاقدا هئچ نه سوروشماق ايسته‌مه‌ديم. اوچونجو
ريسکه گيرسه‌يديم، اونونلا بير داها گؤروشمک ايمکانيني ايتيره بيلرديم. آرتيق،
گئتمک واختي‌يدي.
قهوه‌ني بيتيرديکدن سونرا باييرا چيخيب، بير آز
او يانليقدا آيريلديق. بوندان چوخ اونو ساخلايا بيلمزديم. بو گؤروشلرين آردي
اولماسيني ايسته‌ييرديم، اونا گؤره تلَسمه‌مه‌لي‌يديم.
او گوندن سونرا بيليم‌يوردوندا داها چوخ
بيربيريميزه ياخينلاشماغا باشلاديق. آرتيق، بير آيدان سونرا سئوگيلي دورومونا گليب
چاتديق. ياواش-ياواش اؤزوندن دانيشماغا باشلادي. اسکي سئوگيلي‌سيندن، اونون اؤنجه
ياخشي اولوب سونرا پيس اولماسيندان، سون آيلاردا اونون باشقا قيزلارلا
گزيب-دولانماسيندان سؤز آچدي. ايکي ايل سئوگيلي ايميشلر، هر نه يولوندا گئتسه‌يميش،
ياخيندا ائوله‌نه‌جکميشلر. سوندا دا اونو داها هئچ سئومه‌ديیيني دئدي.
اونون سؤزلريني دينله‌ديکجه، بير طرفدن او
اوغلاني بئينيمده گئده‌لشديرير، قيناييرديم، باشقا طرفدن ايسه قيزي منه بوراخيب
گئتديیينه گؤره اونا ساغ‌اول دئييرديم. گوندن گونه اونا ياخينلاشديقجا ايچيمده بير
چلپه‌شيک‌ليک، توققوشما يارانيردي. بير ياندان وارلي بير اوغلاندان آيريلميش زنگين
بير قيزلا سئوگيلي‌لشمه‌یين منيم اوچون بؤيوک بير ريسک یارادیردی، او بيري ياندان
ايسه سئوديیيم قيزلا بيرليکده اولماغين دويولماز بير دادي وار ايدي.
منيم بيرينجي سئوگي تجروبه‌م ايدي، اونونسا
ايکينجي‌سي. بيرليیيميزين ايکينجي آييندا، آرتيق، حالي دوزَلميشدي. داها اسکي
سئوگيلي‌سيندن دانيشميردي. منيمکي‌لشمه‌یيني داورانيشلاريندان آچيق-آيدين سئزه
بيليرديم. آراميز، اومدوغومدان داها چوخ ايسينميشدي. ايشلر چوخ گؤزل ايره‌ليله‌ييردي.
قيزي او چتين روحي دورومدان قورتارديغيما چوخ سئوينيرديم.
آنجاق تانيش‌ليغيميزين اوچونجو آيي‌نين
سونلاريندا اونون داورانيشي ياواش-ياواش دَييشمه‌يه باشلادي. من، گئتديکجه، داها
چوخ باغلانيرديم، او ايسه مندن اوزاقلاشيردي. بونو ياخشيجا سئزميشديم. گؤروشمه‌يه
گؤيلو اولموردو، يا دا گؤروشه گئج گليردي. هردن تئلئفونو آچميردي.
بيليم‌يوردو قيش تعطيللرينه گئديردي.
ايمتاحانلارين سونونجو گونونده اونو يئنه او کافه‌ده قهوه ايچمه‌يه دعوت ائتديم.
اؤنجه يوخ دئدي، آنجاق بير-ايکي آدديم يئريديکدن سونرا دعوتيمي قبول ائتدي.
کافه بير آز تونلوک ايدي. گوج-بلايلا بوجاقدا
ايکي بوش اوتوراجاق تاپيب اوتوردوق.
«يئنه قهوه؟!» دئييب گولومسونه‌رک اونا باخديم.
باشي ايله هه دئدي. قهوه ايچرکن آراميزدا هانسي‌سا
بير دانيشيق اولمادي. بير نئچه يول اونون اوزونه باخديم، آما او منيم باخيشيما هئچ
قارشي‌ليق وئرمه‌دي. قهوه بيتديکدن سونرا يئنه ريسکه گيرديم.
«نه اولوب؟! نييه بئله سويوق اولوبسان؟!» دئييب،
گؤزلرينده سئوديیيم باخيشي گؤره بيلمه‌ديیيمدن، دوداقلارينا باخديم.
«هئچ! بوگون بيزيم تانيش‌ليغيميز يا دا سئوگيلي‌ليیيميز،
آديني هر نه قويورسان قوي، بوردا بيتير!» دئدي. چوخ سويوق‌قانلي گؤرونوردو.
«بيتير نه دئمک؟!!»
«چوخ ساغ اول. سنين‌له اولماق منيم اوچون يئني
بير تجروبه‌يدي. مني روحي سارسينتيدان چيخارتدين. بونا گؤره سنه بورجلويام. آما،
آرتيق، من ايسته‌ديیيم آدامي تاپميشام. سنين‌له اولماق اسکي سئوگيليم‌له يئني
سئوگيليمين آراسيندا بير گئچيد دؤورو کيمي ايدي. بو منيم اوچون ده يئني بير تجروبه‌يدي.
دوغرودان دا اونوتدورماقدا چوخ اوستا بير آدام‌سان. من سنين يئرينده اولسام، بو
ايشين آرديني توتارام: گئچيجي سئوگيلي اولارام، اينسانلارا اسکي اوغورسوز
سئوگيلريني اونوتدورارام! بئله‌جه ياخشي پول دا قازانا بيلرسن!» دئييب منه باخاراق
گولدو.
منيم اوزومده‌کي چاشقينليغي، دونوقلوغو گؤروب
اليني اليمين اوستونه قويدو.
اليني توتماق ايسته‌ديم، آنجاق گئري چکدی.
«آخي من سني سئويرم،» دئييب گؤزلرينه باخديم.
«بو سؤزلري بوراخ. بير آز جيدي اول. بيزيم بيرليیيميزين
اوزانماسي ايکيميزه ده ضرر يئتيره بيلر،» دئييب، قهوه فينجانيني آغزی اوسته نلبه‌کي‌يه
چئويريب آياغا قالخدی.
«بئله کي اولماز! هر نه بو راحاتليقدا بيته بيلمز
کي!»
«ائله باخما! دور گئدک!»
کافه‌دن چيخديق. دؤرديول آغزيندا ال سيخيشديق.
آيريليب خيياواني گئچدي. دونوب قالميشديم. ايشيق قيزاردي. اونون اوزاقلاشماسيني
ايزله‌ديم.
آخشام اوستو زنگ ائله‌ديم. اؤنجه تئلئفونو
آچمادي. بئش يول زنگ ائدَندن سونرا آچدی.
«سؤزوموزو دانيشديق. لوطفن بير داها زنگ ائله‌مه!»
دئدی.
«منه هئچ فورصت وئرمه‌دين دانيشماغا. منيم ده...
آلو! آلو!»
تئلئفوندان کسيک سيقنال سسي گلدي. اوندان سونرا
بير داها تئلئفونو آچمادي. بير هفته‌دن سونرا دا تئلئفون نؤمره‌سيني دَييشدي. همن
گون پوستچو بير پاکات گتيردي. پاکاتين ايچينده بير چئک وار ايدي، اوستونده مبلغ
يازيلميشدي، آرخاسيندا ايسه قيزين ايمضاسي گؤرونوردو. کيچيک بير کاغيذ پارچاسي دا
چئکين آلتيندا وار ايدي، اوستونده، «بير آيريليق هديه‌سي! چکديیين زحمتلره گؤره
چوخ ساغ اول! سولماز!» يازيلميشدی.
قيش تعطيللري بيتديکدن سونرا او قيزي يئني تئرمده
گؤرمه‌ديم. سوراقلاشديم، بير تئرم ايذين آلديغيني اؤيرَنديم. پاييز تئرمينه گله‌نده
اونو باشقا بير اوغلانلا بيليم‌يوردونون اؤنونده ال-اله گؤردوم. اوز-گؤزو چوخ دَييشميشدی.
ايکي ايل اوندان سونرا بونا بنزر بير ماجرا يئنه
باشيما گلدي. يئني بير قيزلا ياريمچيق بير سئوگي ياشاديق. او دا بوراخيب گئتدی.
اوتوروب دوشوندوم. بوتؤو سئوگي ايشينده
باجاريقسيز، ياريمچيق سئوگي‌نين ايسه اوستاسي‌يديم. بئله‌ليکله ياواش-ياواش سئوگي
ايشينه بير پئشه کيمي گيريشمه‌يه باشلاديم. ايندي نئچه ايل‌دير اوغورسوز سئوگييه
دوشن، داها چوخ،وارلي قيزلارين اؤته‌ري سئوگيلي‌سي اولورام.
Comments
Post a Comment