چاپیق
قار یاغیردی. کيشي، مئيدانين
گيريشينده دايانيب، هنده‌وَري گؤزدن گئچيرتدي. مئيدانين ساغ طرفينده ايکي گنج، چلله‌يين
ايچينده اود قالاميشدي. اوغلانلار هردن یئشیکده‌کی کاغیذلاردان گؤتوروب اودا
آتیردیلار، اود بیر آز آلوولانیردی.
«آلتميش ايل بوندان قاباق دا
ائله اوردا اود قالاميشديلار،» اؤزو اؤزونه دئيیب، گؤزونو اودا زيلله‌دي کیشی...
2
مکتبلي اوشاقلار تونقالين اؤنونده سيرا ایله دوزولموشدولر.
آرخادا دا بؤيوکلر دايانميشدي.
«سيرايلا گلين کيتابلاريزي
آتين اودا،» دئيه‌رک، تئز-تئز باغيريردي اونيفورمالي قارا کيشي. «اعلاحضرت'ين امري‌دير، تورکو کيتابلار بوگوندن داها هئچ کيمه لازيم
دئييل، هاميسي يانديريلاجاق.»
اوشاقلار بير-بير گليب، کيتابلاريني
تونقالا تولازلاييب، باغيران كيشي‌يه گؤزآلتي باخيب تيزيخيرديلار. يانماقدا اولان
کيتابلاردان قالاق دوزَلميشدي.
سيرا اونا گليب چاتدي. گؤزلري
سَيرييه- سَيرييه، «آ-آ-آتميرام،» دئيیب، اودقونا-اودقونا کیشی‌یه باخدی. «من بو
کيتابلاري چوخ سئويرم!»
قارا کیشی، «كس سسيوي، کوچويون
بيري کوچوک! قودوقلانما!» دئيیب، شاپالاغي اوشاغين قولاغينا ائنديردي.
اوُشاق يئره ييخيلدي، باشی
پیلله‌نین تینینه دَیدی، آلني ياریلدي، قان ائله آخدي کي!
آتاسي‌نين سسي قووزاندی:
«اوُشاغي نييه ووُرورسان، آي قوْرخاق
گئده! گوجون اوُشاغا چاتير؟!»
سوْنرا ساواشما سسي یوکسَلدی.
تاپپيلتي، شاپپيلتي، سؤيوش سسي توْنقالين چيرتيلتي‌سينا قاريشدي.
«قاراش! قاراش! نه اوْلدو
سنه؟!» دئیَن آناسی‌نین سَسی دَیدی قولاغینا.
اوْغلانين گؤزلری قارالدی.
باشی‌نین اوستونده تونقالين اييي، توستوسو، آداملارين قارالتي‌سي فیرلانماغا
باشلادی...
3
قاراش، الی‌یله آلنینداکی
چاپیغا توخوندو، یارانین یئری سیزیلدادی.
«آلتميش ايل...» دئییب کؤکسونو
اؤتوردو.
گؤزونده‌کی بیر داملا یاشی
سیلیب یولا دوشدو.
Comments
Post a Comment