آتاسينين گزديیي آغاج
قوربان'ين آتاسي عسگر ده گنجليیينده نرگيز آدلي بير قيزي قاچيرتميشدي. قيزي آلميشدي کورهیينه
آپارميشدي خالاسيگيله. يول بويو نرگيز يومروقلا دؤيموشدو اوغلانين باشينا. عسگر
خالاسيگيله چاتاندا، باشي گيجلميشدي، ييخيلميشدي اوتاغا. هئچ نهدن خبري اولمايان
خالاسينين آز قالميشدي اورهیي دايانسين. عسگر گؤزونو آچاندا، آناسيني،
باجيلاريني، خالاسيگيلي گؤرموشدو. هاميسينين گؤزو ياشلييدي. نه اولدوغونو
سوروشموشدو، سيز کيمسيز دئميشدي. اونلارين بيردن آغلاشديغي اونو لاپ چاشقينليغا
سالميشدي. آخشام اولاندا آغلي باشينا گلميشدي، آناسيگيلي، خالاسيگيلي تانيميشدي.
بيردن نرگيز يادينا دوشموشدو، ديک دوروب اوتورموشدو. نرگيز'ين هارا گئتديیيني
سوروشموشدو. خالاسي، نرگيز'ين قاچيب گئتديیيني دئميشدي. آياغا دورماق
ايستهميشدي، باشي يئنه گيجهليب يئره سريلميشدی.
نئچه گون
چکميشدي اؤزونه گلمهسي. بير گون آخشام اوستو عسگر باغدان ائوه تک گلهنده، یولدا
نرگيز'ين قارداشلاري اونون قاباغيني کسيب، اونو دويونجا دؤيموشدولر.
آشا-آشا اؤزونو بير تهَر ائوه چاتديرميشدي. ائودهکيلر عسگر'ين اوز-گؤزونو لالا
قان ايچينده گؤرهنده ال-هايا قالميشديلار. نئچه گون چکميشدي ساغالماسي.
****
قوربان دئدي، «نازليیلا آنلاشميشيق. صاباح گوناورتا
چاغي مکتبدن گلهنده قاچاجاغيق.»
دئديم، «بو
داشي تؤک اتهیيندن، آي قوربان. ايندي داها قيز قاچيرتماق زاماني دئييل.»
«يوخ، من او
قيزي چوخ سئويرم. او دا مني سئوير، مئساژلاريندا دؤنه-دؤنه منه يازيب. آما دده-ننهسي
راضيليق وئرمير.»
«هئچ عاييلهلريز
ده بيربيرينه ياراشمير.»
«يوخ،
قاچيرداجاغام.»
«اؤزون
بيلرسن!»
****
نئچه گون قوربان'دان خبر اولمادي.
اونو گؤرمک اوچون ائولرينه گئتديم. قوربان ائوده يورغان-دؤشک ايچيندهيدي.
آتاسي
اوتورموشدو، پاپروز چکيردي. آناسينين ياراسي، مني گؤرجک، دئشيلدی.
«گؤر
اوغلومو نه گونه قويوبلار.»
قوربان'ين اوز-گؤزو گؤيَرميشدي.
«نه اولدو،
به، قوربان؟!»
«هئچ زاد،
قيزي قاچيرداجاغيم گون، بيردن قيز قاچماقدان واز گئچدي. هاي ديله توتدوم گل قاچاق،
قولاق آسمادي. من ده زورلا قولوندان ياپيشيب ماشينا مينديرمک ايستهديم. او سيرادا
قيزين قارداشي ايله آيري بير اوغلان بيلميرم بيردن هاردان تاپيلديلار، تؤکولدولر
باشيما. مني بو گونه سالديلار. قيز دا قاچيب گئتدي.»
قوربان'ين بو سؤزلريني
ائشيدن آتاسي، ساغ قولونو چيرمالاييب، قوربان'ا اَيري-اَيري
باخا-باخا بيردن پارتلادی:
«بير منيم
قولوما باخ.»
قولوندا
يارا يئري وار ايدي. قوربان آتاسينا چاش-باش باخدی.
«آي کولباش،
من ده او قيزين بيبيسيني قاچيرتميشديم!»
اللرینیزه اورهیینیزه ساغلیق، قیز قاچیرتماق هلهدهکی وار بیزیم شهرده دبدن دوشمهییب. داییمین اوغلو ایستهدیی قیز یئرینه قونشو قیزین قاچیرتمیشدی، یولون یاریسیندا بیلیب قیزی قایتاریب ایستهدیی قیزی-ایندیکی حایات یولداشین- قاچیرتمیشدیلار.
ReplyDeleteگولمهلیسی بودور کی دایی اوغلوم گیل گئدیب گلنه دک قیز کوچهده بونلاری گوزلهییرمیش