آه، پیکاسو!
اوغلان، الیندهکی تابلونو قوجا کیشییه وئردی.
«یانی بو تابلونو اؤزون چکیبسن؟!» دئییب، قاشلارینی
چاتاراق اوغلانا باخدی قوجا کیشی.
اوغلان، «بلی، اوستاد. نئجهدیر؟!» دئییب قوجانین اوزونه گولومسهدی.
«گؤزل بیر اثردیر. آنجاق بیر شئی وار!»
«نهدیر، اوستاد؟!»
«نئجه دئییم...بو...بو منیم اثرلریمه بنزهییر!»
«نئجه یعنی؟!»
«باخ، بو یاماق-یاماق چکدییین قیزی من اؤز رسیملریمده
یاراتمیشام.»
«آخی، من هئچ سیزین اثرلرینیزی ایندییهجن گؤرمهمیشدیم
کی! ائله بوگون ایشلیینیزده گؤردوم.»
«بهیم اولار کی، گؤرمهیهسن؟!»
«من هئچ رساملیق کورسونا گئتمهمیشم کی. رسیم
چکمهیی ائله او یان بو یاندان اؤیرَنمیشم.»
«یالان دئییرسن!»
«یوخ، اینانین، یالانیم یوخ. بو بنزهمه تصادوف
اوزوندندیر.»
«نه تصادوفو؟! بو قدَر ده تصادوف اولا بیلر؟!»
«اؤز جانیم اوچون! دوز دئییرم»
«بوش یئره آند ایچمه!»
«بوش یئره دئییل، اورَکدن آند ایچیرم.»
«اینانمیرام. هله بونو دئ گؤرک، منیم ایشلیییمده
سنین نه ایشین وار؟!»
«بیلیرسینیز، بو تابلو منیم ایلک جدی ایشیمدیر.»
«یاخشی...»
«یولداشلاریمدان بیری بونو گؤردو، بَیهندی. سونرا
منی تابلو ساتان قارداشی ایله تانیشدیردی.»
«اوهوم...»
«قارداشی منه دئدی کی، تابلونو بیر اوستاد رساما
گؤستَر. سیزین آدرئسینیزی وئردی منه.»
«اوندا آللاه ووروب باشیندان، اؤز آیاغینلا گلیب
تورا دوشوبسن!»
«ن...نه تورو؟!»
«اوغرو قاییدیب اوغورلوق یئرینه! هاه...هاه...هاه!»
«نه اوغروسو؟!»
«تابلو اوغروسو! دوشونجه اوغروسو! صنعت اوغروسو!»
«بؤهتان آتمایین منه، گوناهیمی یومایین، اوستاد
پیکاسو!»
«نه بؤهتانی، نه گوناهی؟!»
«م...من...»
«عؤمور بویو زحمت چکمیشم، اؤزومه بیر طرز چیخارتمیشام،
سونرا سنین کیمی اوغرولار گلیب منیم فیکریمی چالیرلار!»
«یوخ، هئچ ده ائله دئییل! بو منیم اؤز امهییمین
نتیجهسیدیر.»
«هله، او چکدییین قیز منیم سئوگیلیلریمدن بیرینه
بنزهییر. حتی سئوگیلیمی ده اوغورلاماق ایستهییبسن!»
«نه قارا گونه قالدیق ائ...! نه سئوگیلیسی؟!
بو رسیمدهکی قیزی اؤز سئوگیلیمه بنزَتمک ایستهمیشم.»
«اوندا منیم سئوگیلیمده ده گؤزون وارمیش!»
«بو نه سؤزدور، اوستاد؟! او قیزی من سئویردیم،
آنجاق اونا چاتا بیلمهدیم، نئچه ایل بوندان قاباق آیری بیر اوغلانلا ائولَندی. اؤز
شهَریمیزدن ایدی.»
«یالان دانیشما! من سندن شیکایت ائدهجهیم،
سنی محکمهیه چکهجهیم!»
«عجب ایشه قالدیق آ! بیلیرسینیز نهدیر؟! من کؤکوندن رساملیقدان، بو تابلودان
واز گئچیرم! قویون چیخیم گئدیم!»
«هارا گئدیرسن، زنگ ووراجاغام پولیسه، گلیب هر
نهیی قئیده آلسین، سونرا گئده بیلرسن.»
«یوخ، قویون گئدیم...»
اوغلان بیردن یئریندن آتیلدی. گؤزلرینی بیر آز اوووشدوردو. او یان بو
یانا باخدی. اوستاد پیکاسو'دان خبر یوخ ایدی.
«یاخشی کی، یوخویدو!» دئییب، دریندن نفس آلدی.
دووارداکی تابلویا باخدی، یوخودا گؤردویو تابلویدو. یاتاقدان قالخیب تابلویا
یاخینلاشدی. رسیمدهکی قیز گولومسهییردی. او دا گولومسهدی.
Comments
Post a Comment