ییغوا

 

 

ياشار، «گوج-بلايلا بو گئجه اوچون بيزه واخت وئريب. هئچ گؤر تئلئفونونو آچيردي! قاپي­سينا گئتديم، اونونلا ياخيندان دانيشديم،» دئدی.
احمد، «هه، ائشيتميشم بو گونلرده بازاري يامان قيزيشيب، عم­­اوغلوم دئييردي شن­ليیيميزه چاغيرديق، دئدي گرک ايکي آي قاباقدان چاغيرايدينيز، واختيم دولودور!» دئدي.

قاسيم، «گئچن هفته کيچيک قاينيمين تويويدو، ائله بو ميرت­آغا'ني دعوت ائله­ميشديلر، ايکي ساعاتليق گلدي، يئرينيز بوش، يامان گولدوک، اوره­یي گئچَنلر ده اولدو،» دئدي.

من، «آدي ميرت­آغا'دير؟!» دئيه سوروشودوم.

ياشار، «يوخ، آدي خان­اوغلان'دير، آما ائل شن­ليکلرينده جاماعاتي گولدوردويونه گؤره خالق اونا ميرت­آغا دئيير،» دئدي.

قاسيم، «هه، سن آخي تئهران'دا ياشایيرسان، اونا گؤره بورادا اولوب-گئچَنلردن ائله خبرين اولمور. بورادا تويدا هم موسيقي وار هم ده آرادا ميرت­آغا جاماعاتي گولدورور، بير نئچه ايل اولار تويلار بئله گئدير،» دئدي.

احمد، «هه ده، تئهران'دا ميرت­آغا'ني هارادان تاپاجاقسان؟!» دئدي.

«تئهران'دا دا بعضي رئستورانلاردا ميرت­آغا کيمي آداملار وار،» دئيه گولومسوندوم.

قاسيم، «هله دئ گؤرک هاچان گله‌جک بورا؟» دئيه ياشاردان سوروشدو.

«سون دفعه دونن گون­اورتا چاغي اونونلا دانيشديم. اؤنجه تئلئفونونو يئنه آچماياجاق سانديم، آما سون زنگ سيقناليندا آچدي. دئدي بو گئجه اون ايکيده بورادا اولاجاق. بير تويدا چيخيشي وار، اوندان سونرا بورا گله‌جک. اؤن­اؤدنيش اوچون ده اللي مين حئسابينا ياتيرتديم. اؤز يانيندا بير حئساب-کيتابي وار، اؤزو اوچون بئله‌سينه بازار قيزيشديرير،» دئييب گولدو.

«هله آرخايين­سان گله‌جک؟» دئيه سوروشدوم.

ياشار جاواب وئرمه‌ميشدن اؤنجه احمد بيردن سؤزون اورتاسينا آتيلدي.

«هه ده، نئچه يول زنگ ائله‌ييب، گئديب ياخيندان دا دانيشيب. آرتيق، ياشار اونو گتيرمک اوچون لازيم اولاسي اعتيباري قازانيب!» دئدي.

گولوشمه سسي بورودو اوتاغي. ياشار'ين هاققيلتي­سي، احمد'ين قاققيلتي­سي، قاسيم'ين پيققيلتي­سي، منيم قيققيلتيم. دئيه‌سن بيزيم ميرت­شوولو گئجه‌ميز ائله آخشام چاغيندان باشلاميشدي. بوتون بونلار ميرت­آغا'نين مجليسينه بير گيريش اولا بيلردي. نئچه ايلدن سونرا اوشاقليق يولداشلاريملا بير يئره ييغيشيب اوشاقليق ايللري کيمي بير نئچه ساعات اوچون بوتون قايغيلاريميزي، فيکيرلريميز اونودوب، اوتوز ايل اؤنجه‌يه قاييتماق ايسته‌ييرديک بو گئجه. هله باشدا ائله بو ميرت­آغا'نين گلمه­یي ميرتا چئويريلميشدي، گؤر ايندي ميرت­آغا'نين اؤزو گلسه­يدي نه اولاجاقدی!

ايللر سونرا يئنه بير گئجه باغدا گئچيره‌جکديک. ياشار'گيلين باغي­نين کؤمه‌سي ائله اوشاقليقدا گلديیيميز خام کرپيجدن تيکيلميش کؤمه­يدي، ساده­جه بير آز اوست-باشينا ال چکيلميشدي، تعمير ايشلري آپاريلميشدی.

ياشار، «بو ايل دئيه‌سن قيش تئز گله‌جک. هله کيچيک چيلله‌يه بير آي قالميش هاوالار سويويوب،» دئييب سوبانين ايچينه نئچه پارچا اودون ايتله‌دي. سونرا آلتداکي کؤزو بير آز ائشله‌دي. «دونن گئجه ده بورادايديق، گئجه‌لر کؤمه سويوق اولور.»

قاسيم ائشيکدن دولدوردوغو چايداني سوبانين اوستونه قويدو. ياشار کؤمه‌نين قاپي­سيني آچدي، باغا چيخماق ايسته‌دي. قاپي­نين آراسيندان سازاقلا بيرليکده بوزباشين اييي ده ايچري­يه گيردي.

«دئييرم يامان آجميشام آ، آي ياشار،» دئيه گولومسوندوم.

ياشار، «يئمک ده پيشيب، چوخدان آسميشام، گئديرم گتيرم،» دئيه کؤمه‌دن چيخدی.

شامي يئييب ييغيشديرماغيميز بير ساعاتدان چوخ چکدي.

ياشارا، «هئچ بيلميرديم بئله ياخشي آشپازسان!» دئييب تأييد اوچون احمد'له قاسيم'ا باخديم.

ياشار گولدو.

قاسيم، «دا آدامين آروادي ريیس اولاندا بعضي خئييرلري ده آداما توخونور. آج کي قالماياجاق!» دئييب گولدو.

احمد، «ائله‌دير. باخ، من کي آنجاق يومورتاني سودا پيشيره بيليرم، او دا مجبور قالاندا. آللاه آروادي بيزه چوخ گؤرمه­سین!» دئدي.

اونون سؤزونون آرديني توتان قاسيم، «من ده يومورتاني ايکي جور پيشيره بيليرم، ياغدا، سودا،» دئييب گولدو.

«بره­کاللا سنه، خانيم اولاماسا، سن احمد'دن بير آز داها چوخ ديري قالا بيلرسن!» دئديم.

هره اؤز گولمک طرزي ايله يئنه اوتاغي جينگيلدَتدي. منيم گولمه­یيمين بير آزي دئييلن سؤزلره، بير آزي دا آتيلان گولوشلرين سسينه گؤره­يدي. اوشاق­کن ياشار'لا قاسيم شهرده‌کي تانيديغيميز چئشيدلي آداملارين دانيشيغيني، گولوشونو، داورانيشيني يامسيلاييب بيزي گولدوررديلر. نئچه ايل آيريليقدان سونرا بلکه بو گولوشلر، منيم کيمي اونلارا دا او يامسيلامالاري خاطيرلاديردي.

«من ده ائله چوخ يئمک پيشيره بيلمه­رم، ياني خانيم بير هفته‌دن چوخ ائوده اولماسا، ايکينجي هفته‌دن پيشيرديیيم يئمکلري باشدان باشلامالي اولورام،» دئييب گولومسوندوم.

قاسيم، «اوندا يئمک پيشيرمکده آلديغيميز خاللارلا اؤزوموزو سيرالاماق ايسته­سک، ياشار'ا اون خال، آيدين'ا بئش خال، منه اوچ خال، احمد'ه ده بير خال، او دا اوره­یي سينماسين دئيه، يوخسا بير خالدان دا آز اولا بيلردي،» دئييب گولمه‌يه سالدي بيزي. البته احمد'ين قولاقلاري بير آز قيزاردي.

ياشار، «بيزيم خانيم کي ائله ايلک گوندن مندن گئج گليردي ائوه، ايشي چوخ اولوردو. اونا گؤره باشيمين چاراسينا باخمالي اولدوم. آما حاقدان گئچمه­مه‌لي­يم کي، خانيميم رئستورانلاري ياخشي تانييير!» دئييب گولوشویله دولدوردو یکؤمه‌ني.

ياشار چايي قورتوملايا-قورتوملايا قولونداکي ساعاتا بير باخدي. بنيزينده بير آز نيگارانليق وار ايدي. قاسيم'لا احمد هره‌سي بير بالينجا ديرسکله‌نيب قيچلاريني اوزاتميشديلار. منله ياشار دا کوره­ییمیزی دووارا سؤيکه‌نن بالينجا دایاییب باغداش قورموشدوق.

«ميرت­آغا يوبانيب؟» دئيه سوروشدوم.

«يوخ، هله، گلمه­یينه بير آز قاليب،» دئدي ياشار.

احمد ايکينجي چاييني تؤکدو فينجانا.

چايي­نين تيليفيني قورتولدادان قاسيم کهيلده­يه‌رک، «دئييرم گولمکلريميزدن بير آز دا ساخلاياق ميرت­آغا اوچون، قورخورام او گله­نه­جن گولمه­یيميز کؤکوندن توکنميش اولسون،» دئييب گولدو.

احمد، «هه، دوز دئييرسن، گولمه­یيميز بيترسه ميرت­آغا'يا وئره‌جه­یيميز پول باتاجاق،» دئدي.

ياشار، «قورخمايين، اونون دَيينديیي مؤوصوعلار يئپ­يئني­دير، مجليسه باخير دوروشونو سئچير،» دئدي.

«بو ميرت­آغا'ني او قدَر تعريفله‌ييب­سينيز کي، صبيرسيزليکله اونو گؤزله‌ييرم. سانيرام ائله قاپيدان ايچه­ري گيرجک مني گولمک باساجاق،» دئييب گولدوم.

قاسيم، «ميرت­آغا'نين اوز-گؤزو، اوست-باشي دا گولمه‌لي­دير، آدام اوّلده اونون اؤزونه گولور، دانيشاندان سونرا سؤزونه گولمک ده قاريشير اؤزونه گولمه‌يه،» دئييب پيققيلدادي.

«اوندا يوز سکسن درجه گولدورور آدامي: دوخسان اؤزو، دوخسان دا سؤزو! هله دئيين گؤرک بو ميرت­آغا کيملردن­دير؟ بورالي­دير؟» دئيه سوروشدوم.

«آسلان عمي­نين اوغلودور. تانيييرسان دا، يوخ؟!» دئدي ياشار.

باشبارماغيملا چنه‌مي قاشيياراق، «هانسي آسلان عمي؟» دئيه سوروشدوم.

«بازار کؤرپوسو'نون يانيندا کابابچي توکاني وار ايدي ها،» دئيه قاسيم جاواب وئردي.

سئوينه‌رک، «هه، هه، ياديما دوشدو، اوشاقليقدا بير نئچه دؤنه آتاملا اورادا کاباب يئميشديک. ميراثا قالميش کابابلارينين يامان اييي گلَردي. گون­اورتا چاغي مکتبدن گلَنده اونون قاباغيندان گئچَرديک، بير ياندان آجيندان قارنيميز قورولداياردي، بير ياندان دا کاباب اييي بورنوموزو شيشيردَردي،» دئديم.

«هه، ائله اؤزودور،» دئدي احمد.

«هه، هه، دوزدور، ساغ اول. من او گونلري اونوتموشدوم، ياخشي سنين ياديندا قاليب، آيدين!" گولومسونه‌رک دئدي ياشار.

قاسيم، «بير گون مکتبدن ائوه گلديم، يامان آجميشديم، بئش اوخويوردوم. گؤردوم ائوده کيمسه يوخدور، سوراقلاشديم گؤردوم آنام گئديب بالقيز خالا'گيله. قوجا بير قادين ايدي، تک ياشاياردي، اري اؤلموشدو، بير اوغلو وار ايدي، او دا اردبيل'ه کؤچموشدو. چوخ ايشلرينه ائله آنام يئتيشَردي. او گون بالقيز خالا'نين باشي گيجَلميشدي، يئره ييخيلميشدي. آنام گئتميشدي اونا دَيسين، اونو او وضعيتده گؤرموشدو. مطبخه گئتديم گؤردوم گون­اورتا يئمه­یيندن خبر يوخدور. چوخدان ايدي آسلان عمي­نين کابابي­نين حسرتي اوره­یيمده قالميشدي، آتاما دا نئچه دفعه دئميشديم، آما منه کاباب آلماميشدي. بير ياندان آجيمدان گؤزلريم قاراليردي، بير ياندان دا ناهارين اولماماسي مني فيکره سالميشدي. چانتا-زاديمي ائوه قويوب قاچا-قاچا گئتديم آسلان عمي­نين توکانينا. يئمک چاغي اولدوغونا گؤره توکاندا اوچ-دؤرد آدام وار ايدي، کند آلوئرچي­سي­یديلر،» دئدي. بير آز اودقوندو. سويوموش چاي فينجانيني باشينا چکيب يئره قويدو.

هاميميز اوزوگولوشلو اونون سؤزلريني دينله‌ييرديک.

«هه، بوجاقدا بير اوتوراجاق بوش ايدي، توکانا گيريب اورادا اوتوردوم. آسلان عمي منه تعجوبله باخدي. هه، نه­دير اوغلوم دئدي. دئديم آي آسلان عمي آتام دئدي کي، منه ايکي کاباب وئرين يئييم، اؤزو گليب پولونو اؤده­يه‌جک. آسلان عمي ده منيم سؤزومه اينانيب، مانقالين ايچينده‌کي کؤزلو کؤمورون اوستونه ايکي شيش دؤيمه کاباب قويدو. کاباب پيشه­نه­جن منيم آغزيمين سويو آخيب تؤکولدو. سونوندا کابابي يئييب توکاندان چيخاندا آسلان عمي سوروشدو خوشووا گلدي آ بالا. دئديم چوخ يئمه‌لي­يدي، ساغ اولون، آسلان عمي. ائوه قاييتديم، بير آزدان آنام گلدي. دئيه‌سن بالقيز خالا'نين حالي دوزَلميشدي. آتام گونده ساعات ايکيده ايشدن گلَردي، اونداياجان آنام ناهاری آسيب پيشيردي. من ده اوزدن­گئچمه سوفره‌ده بير ال دولانديرديم. بير آي-زاد بو اولايدان گئچدي، بير گون گؤردوم آتام ائوه گلدي، چوخ غيظلي ايدي، اوتاغا گيردي، مني گؤرجک بير شاپالاق گئيديردي ساغ قولاغي­مين ديبيندن. آنام ائوده يوخ ايدي مني اونون اليندن آلسين. بير شاپالاق داها قويدو سول قولاغي­مين ديبيندن. آغزيم آچيق قالميشدي، آتام مني نييه ووروردو. آغلايا-آغلايا دئديم آي آتا، آخي نئيله‌ميشم؟! دئدي اؤزباشينا گئديب کابابچيدا کاباب يئييرسن، يالان دانيشيرسان، مني ده ايشيندن خبرسيز قويورسان؟! بوگون آسلان قاباغيمي کسدي دئدي بس بيزيم بورجو هاچان وئره‌جکسن، دئديم نه بورجو؟! دئدي به­يم خبرين يوخدور، آخي او گون اوغلون گليب بيزيم توکاندا کاباب يئدي، دئدي آتام گليب حئسابلاياجاق. کول باشيوا، منيم آبريمي تؤکورسن؟! بير ده بودان سونرا بو اويونلاردان چيخسان، بئله ووررام اؤلون قالار. آتام اوتاقدان هیرسله چیخدی،» دئییب سؤزونو بيتيردي قاسيم.

بيز گولمکدن گئچينميشديک. بير چاينيک چايي هئچ بيلمه‌ديک هاچان تؤکوب ايچميشيک.

ياشار، «اؤنجه کاباب، سونرا کؤتَک! دئييرلر کابابدان سونرا کؤتَک يامان ياپيشار!" دئييب گولدو.

«سن لاپ ائله آتالار سؤزو ياراتدين آ، ياشار!» دئييب گولدوم.

ياشار'ين هاققيلتی­سی اوتاغي دولدوردو.

احمد، «عجب اويون اولوب!» دئيه قاسيم'ين خاطيره‌سينه فيکير بيلديردي.

ياشار قاسي'ما، «ايندي کي سن اونو دئدين، منيم ده بير خاطيره ياديما دوشدو،» دئدي.

احمد، «دئ گؤرَک سن کيمين باشينا بؤرک قويوبسان!» دئييب قاققيلدادي.

احمد'ين سؤزونه مي يوخسا قاققيلتي­سينا مي قاسيم'ين گولمه­یي توتدو. اونون آردينجا من ده گولدوم، سونرا بير آندا کؤمه‌ده موختليف گولوشلر جينگيلده‌دي.

«يادينيزدادير ايستي ياي گئجه‌لرينده سرينله‌مک اوچون هردن دامدا ياتارديق؟" دئدي ياشار.

هاميميز بيردن، «هه، هه، هه،» دئديک.

«من دامدا ياتماغي چوخ سئوَرديم، اولدوزلارا باخا-باخا، اونلاري سايا-سايا يوخويا دالماغين آيري بير کئفي وار ايدي. ائله ايندي ده خانيمين قورولتوسونو جانيما آليب، هردن دامدا ياتارام،» دئدي ياشار.

احمد، «ياخشي بير فيکيردير ه، بيز ده هردن خانيمدان ايذين آليب دامدا ياتاق،» دئييب گولدو.

بيزيم گولوشلريميز ياشار'ين سؤزونو کسدي. ياشار دا بيزه قوشولوب گولدو.

«هه، من اوشاق اولاندا آسلان عمي'گيل بيزيمله قونشويدولار. بير ايل يايدا آسلان عمی­نین تئهران'دا ياشايان قارداشي­گيل اونلارا گلميشديلر، او ايستي گئجه‌لرين بيرينده کيشي خايلاقلاري دامدا ياتماغا قرار وئريرلر. آسلان عمی، قارداشي ايمران، قارداشي اوغلو حميد، اوغلانلاري ايبان'لا ميرت­آغا ياتماغا داما چيخيرلار. يورغان-دؤشک ساليب اوزانيرلار. حميد'ين آتاسي دئيير کي، منيم اوغلوم بعضي گئجه‌لر دوروب يوخودا يئري­یَر، نئچه دفعه ده گئجه دوروب گئديب او يان بو يانا دَييب اؤزونو يارالاييب. اونا گؤره هردن ائوده اونو توپوغوندان پنجره‌نين توتوجاغينا باغلاييريق. البته تزه‌ليکده يوخودا يئريمه‌سي بير آز آزاليب، آما يئنه ده احتياط اوچون اونو بير يئره باغلاساق ياخشي اولار. نهايت حميد'ي بير کنديرله توپوغوندان تاختا بير کتيله باغلاييرلار. او گئجه بيز ده دامدا ياتميشديق، بيردن گئجه ياريسي هاي-کوي سسي­يله يوخودان آتيلديق. بير طرفدن واي باشيم، واي قيچيم سيزيلتي­سي گليردي، بير طرفدن نه اولدو، حميد، باشيوا نه گلدي؟! باغيرتي­سي، بير طرفدن واي، ائويم ييخيلدي، اوغلوم! قيشقيرتي­سي محله‌ني بوروموشدو. بوتون قونشولار آسلان عمی'گيلين قاپي­سينا تؤکولوشدولر. گئتديک گؤردوک بلي، حميد اوغلان گئجه دوروب يوخودا يئري­یيب، کتيلي ده اؤزويله سوروتله‌ييب، گليب دامدان دوشوب دار کوچه­يه، شانسيندان دام آلچاقميش، کوچه‌ده ده قوم وارميش، ائله او قومون اوستونه دوشوب،» دئدي ياشار.

سؤزون بوراسيندا ياشار'ي گولمک توتدو، او خاطيره دئيَرکن ياواش-ياواش گولن بيزلر ياشار'لا بيرليکده گولمه‌يه بوغولدوق.

«سونرا نه اولدو؟!» دئيه سوروشدوم.

«نه اولاجاق داها! اوغلانين آناسينا، اؤزونه قندسو وئرَن کيم، اونلارين کوره­یيني اووان کيم، آسلان عمي'يه ايمران'ا اورک وئرن کيم! داها آرا قاريشدي، مسسب ايتدي. سونوندا بير ساعات موذاکيره‌دن، موشاويره‌دن سونرا هامي بير قوربانليق کسيلمک قرارينا واردي. قوربانليغين خرجي ده آسلان عمي'نين بوينونا قويولدو،» دئييب فينجانيني گؤتوردو ياشار.

احمد، «عجب اويون اولوب!» دئدي.

ياشار ساعاتينا باخدي. «ميرت­آغا'نين گلمه‌سينه بير ساعات قالير هله،» دئدي.

قاسيم آياغا قالخيب باييرا چيخدي، قاييداندا الينده بير بولود هئيوا وار ايدي.

احمد گولومسونه‌رک، «اده، اونلاري يئسَک گئجه ياري­سينا بير ده آجاريق کي! دئدي.

«عئيبي يوخدور، دوروب اوباشدان پيشيره­ريک! دئدي ياشار.

احمد قيميشدي، قاققيلدادي.

ياشار، «هه، نه اولدو، احمد، بيردن قاققيلتي­يا دوشدون؟! دئيه‌رک دوداغي قاچدي.

احمد گوله-گوله، «هئچ زاد، هئيوالاري گؤردوم بير خاطيره ياديما دوشدو، اونا گولورم،» دئدي.

قاسيم، «دئ گؤرَک. دئيه‌سن سيرا سنه چاتيب.» دئدي.

«يئنيجه يئني­يئتمه‌ليک چاغينا گيرميشديم، باشيم يئللي ايدي. داييم­اوغلو ماحمود'ا قوشولوب قالمايان يارامازليقدان چيخیرديق. هله ماحمود لاپ نادينج ايدي، داش-دووارا ديرماشاردي، محله‌ده اوشاقلاري دؤيَردي، هردن ده اؤزو دؤيولردي، درسه فيکير وئرمزدي، ايت-پيشيک بوغوشدوراردي. من يارامازليقدا اونا چاتمازديم، آما ماحمود'ا قوشولاندا نادينج­ليیيمين درجه‌سي قالخاردي. چوخ واخت ماحمود'ون سؤزونه اويمازديم، آما هردن ده اونون شولوقلوغونا يولداشليق ائله­مک ايسته­يرديم. بير گون ائله هئيوا واختي داييم­اوغلو دئدي کي، گل هئيوا اوغورلوغونا گئدَک. من اونداياجان هئچ بئله ايشلردن گؤرمه‌ميشديم، اونا گؤره اوغورلوق سؤزونو ائشيتجک قورخدوم. آما ماحمود دئدي کي، بو، ائو چاپماق کيمي اوغورلوقلاردان دئييل کي، بير تهَر ظارافات­دير، هم گيزليجه بير ايکي هئيوا دريب يئيه‌جه­یيک، هم ده بير آز اَيله‌نيب گوله‌جه­یيک. بئله-بئله سؤزلرله مني راضي سالدي. راضي­ليغيمي گؤرن ماحمود تئز دئدي کي، بي­بيم­گيلين قونشوسونون باغينا گئدَک، اورادا ياخشي هئيوالار وار. آسلان عمي'نين باجي­سي­گيل ماحمود'ون بي­بي­سي­گيلين قونشولاري ايدي، نرگيز خالا'گيلين باغيندا يئمه‌لي، سولو هئيوالار وار ايدي. ماحمود دئدي کي، نرگيز خالا'گيل گون­اورتادان سونرا باغدا اولمورلار، اوندا گئده بيله­ريک. قرارلاشديق مکتبدن گلَندن سونرا باغا گئدک. ساعات اوچ-زاد هنده­ورينده اونلارين هئيوا باغينا گئتديک، دوغرودان دا ياخشي، ساپ­ساري، گؤزاوخشايان هئيوالاري وار ايدي. هئيواسي ياخشي يئتيشميش آغاجلارين بيرينين بوداغيني اَييب بير-ايکي هئيوا درديک، آغاجين آلتيندا اوتوروب يئمه‌يه باشلاديق. من هئيواني يئيه-يئيه او يان بو يانا باخينيرديم بيرينين گلمه‌سيني گؤروم، آما ماحمود'ون هئچ وئجينه ده دئييلدي،» دئييب قابداکي هئيوالاردان بيريني گؤتوروب بير ديش ووردو، هئيوانين ياريسي گئتدي.

احمد'ين بئله‌سينه هئيوا يئمه‌سي بيزي ده هوَسلنديردي، هره­ميز بير هئيوا گؤتوروب ديشله‌مه‌يه باشلاديق. سانيرام منيم کيمي قاسيم'لا ياشار دا خاطيره‌نين گولمه‌لي يئريني گؤزله‌ييرديلر. 

«هئيواني يئديک قالخديق گئدک، بيردن ماحمود'ون گؤزو آغاجداکي پاييز آرمودلارينا ساتاشدي. آرمودلار دا چوخ ايري ايدي، آدامي چاغيريردي. ماحمود دئدي کي، سن دور بورادا، قوي من چيخيم بو آغاجدان بير-ايکي آرمود دريم، بو آرمودلار يامان يئمه‌لي اولور. من هئچ نه دئمه‌ديم. ماحمود آغاجا ديرماشدي، بير آرمود دريب آشاغي آتدي من توتدوم. ايکينجي آرمودو درَنده بيردن بير باغيرتي ديکسينديردي بيزي. آي کؤپئي­اوغلانلاري، بيزيم باغدا نه غلط دارتيرسينيز، ايندي حئسابينيزا چاتارام دئيه-دئيه گؤردوک نرگيز خالا'نين اري الينده شووول قاچا-قاچا بيزه ساري گلير. اونون آرخاسينجا دا نرگيز خالا گلير. هئچ بيلمه‌ديک بونلار بيردن-بيره هارادان تاپيلديلار. من تو-دابانا قاچديم، ماحمود دا آغاجدان آتيليب قاچماق ايسته‌دي، آنجاق آياغي ايليشدي آغاجدان يئره دوشدو. بير آز اوزاقدا دوروب ماحمود'و گؤزله‌ديم، ايسته‌دي آياغا قالخسين، آما قالخا بيلمه‌دي، واي قيچيم دئيه قيشقيردي. ائله بو آندا کيشي اونون باشي­نين اوستونو کسدي، ايسته‌دي اونو الينده‌کي شوووللـه وورسون، آما اوندان سونرا يئتيشن نرگيز خالا قويمادي. کيشي قيشيقيردي ال چک آرواد، قوي بونو بير ادب ائله­یيم. شووولو قالديردي اونو وورسون، بيردن نرگيز خالا قيشقيردي آي کيشي به­يم گؤرمورسن قيچيندان ياپيشيب، بلکه قيچي سينيب. آنجاق کيشي قادينين سؤزونه باخماييب اونو ايتله‌دي. قادين يئره ييخيليب باييلدي،» دئييب احمد، هئيواسيندان ايکينجي ديشي قوپارتدي.

آرتيق بيز ده ياواش-ياواش گولمه‌يه باشلاميشديق.

«هه، کيشي ال-هايا قالدي، بير طرفده آغريدان قيوريلان ماحمود'ا باخيردي، شووولو قووزاييردي وورسون، بير ده دؤنوب او بيري طرفده بايغين دوشن خانيمينا باخيردي. من ده کي قاچيب-قاچماماق آراسيندا قالميشديم. سونوندا کيشي باغداکي کؤمه‌يه ساري قاچدي، الينده بير قاب سو ايله قاييتدي، سويو قادينين اوزونه چيله‌دي، اونون باشيني قالديريب بير آز سو ايچيرتدي. سونرا دؤنوب ماحمود'ا غضبله باخدي. نرگيز خالا اؤزونه گلَندن سونرا داها قويمادي اري ماحمود'و دؤيسون. بو صحنه­ني گؤردوکده من ده قورخا-قورخا قاييديب گلديم دؤرد-بئش مئتير آرايلا دايانديم. ماحمود'ون آياغي چيخميشدي. کيشي دؤنوب منه ده اَيري-اَيري باخدي، الينده‌کي شووولو منه ساري تولازلادي. بير آز گئري چکيلديم، نرگيز خالا دئدي آي کيشي، بوراخ دا، ايکي دنه مئيوه‌نين نه ديَري وار کي! کيشي ماحمود'ا دئدي قوي من سنين آتاوي گؤروم، ايپيوي ائشه‌جه­یم. منه ده دئدي گل گؤتور بو اوغلاني، ايتيلين بورادان! چکينه-چکينه اورا گئديب ماحمود'ون قولتوغو آلتينا گيرديم، ماحمود سکه-سکه بيرليکده اورادان اوزاقلاشديق، هله ماراقلي­سي بو ايدي کي، درديیيميز مئيوه‌لري ده اؤزوموزله گتيرديک،» دئدي احمد، سونرا هئيوانين توخوملاريني دا چيخارديب آغزينا آتدي.

احمد'ين ناغيلي بيتندن سونرا ياشار قالخدي بير نئچه گونه­باخان توخومو، بير آز دا قوز گتيريب بير سيني­نين ايچينه تؤکدو.
«يئيين، چيرتلايين، بو گئجه يامان ياغ يانديريريق ها!» دئييب گولدو.

يئيه-يئيه، چيرتلايا-چيرتلايا بيردن اوچو ده دؤندولر منه باخديلار. خاطيره تعريفله‌مک سيراسي منه گليب چاتميشدي. ميرت­آغا'نين چيخيشيندان اؤنجه مجليسي قيزيشديران سون آدام من اولاجاقديم. احمد'ين خاطيره‌سيندن سونراکي يارانان سؤزسوزلویون يئريني گونه­باخان توخومونون آغزيميزداکي چيرتيلتي­سي دولدورموشدو.

«بابام دئيه­ردي کي، بو آسلان امينين آتاسي قهرمان عمي چوخ ساده بير کيشي­يميش، اؤزو ده ظارافاتجيل­ميش. قهرمان عمي باغچي­يميش، آما باغي­نين چوخو چايلاق­ميش، چاي داشاندا باسيب اونون باغي­نين آراسيندان گئچَرميش. قهرمان عمي دئيه­رميش ساغ اولسون چايي، قويمور بيز داريخاق، هردن بيزي بو تايا گئچيردير هردن ده او تايا. شاه زاماني تبريز'دن شهَر قاراقولونون باشچي­ليغينا بير يوزباشي گؤندَرميش­ميشلر. چوخ زهيملي بير آدام­ميش، هامي يوزباشي جاببار'دان قورخارميش، حتّي شهَرين بؤيوکلري، آغ­ساققلاري. هر کيمين ايشي قاراقولا دوشسه­يميش، هئچ اولماسا دؤيولمه­یي گؤز قاباغينا آلارميش. بير گون بو يوزباشي ائوينه گئديرميش، يولدا قهرمان عمی'يه راست گلير، قهرمان عمي مئيوه‌ني تليسده کوره­یينده داشيييرميش. بو وضعيتي گؤرَن يوزباشي جاببار قهرمان عمی'يه آجي­يير. دئيير آي قوجا، نييه بير ائششک آلميرسان يوکلريوي اونا چاتاسان؟! اونون بو سؤزونو محبتلي سانان قهرمان عمي گولومسونه‌رک دئيير آللاه'ا شوکور هله آياقدان دوشمه‌ميشم، آللاه جانينيزي ساغ ائله­سين، ائله سيزين ساغليغينيز منه ائششکه‌دير ده. بو سؤزو ائشيدن يوزباشي بيردن غیطله‌نيب قيشقيرير، قهرمان عمي'ني يامانلايير. يانينداکي گيزيره دئيير توتون آپارين بو سارساغي، باش-گؤزونو اوووشدورون. قهرمان عمي'ني تانييان گيزير دئيير بو قوجانين سؤزونو اؤزونوزه آلمايان، قوربان. ساده کيشي­نين بيري­دير، شهَرده هامي بونو تانييير، سؤزلري هئچ کيمين اوره­یينه ديمَز. نهايت گيزيرين اورادا اولماسي قهرمان عمي'نين قاني­نين آراسينا گيرير،» دئديم.

يولداشلاريمين گولوشمه‌سينه من ده قاتيلديم.

قاسيم، «آغزين شيرين اولسون، چوخ گولدوک،» دئدي.

احمد، «اوندا میرت­آغا ظارافاتجیل­لیقدا ائله باباسینا چکیب!» دئدی.

آرتيق، توخوم دا قوز دا توکَنميشدي، مئيوه قابي بوشالميشدي، چاينيکده ده ساده­جه تيليف قالميشدي. ياشار ساعاتا باخدي، گئجه ياريني آشميشدي، آما هله ميرت­آغا'دان خبر يوخ ايدي.

احمد، «به بو ميرت­آغا گليب چيخمادي، آي بالا!» دئييب ياشار'ا باخدي.

ياشار، «ايندي تاپيليب گلَر،» دئدي.

بير آزدان تئلئفونونو گؤتوروب ميرت­آغا'يا زنگ ائله‌دي، هاميميز اونا باخديق. نئچه يول ميرت­آغا'نين نؤمره‌سيني ييغدي، آما جاواب چيخمادي.
«تئلئفونونو آچمادي،» دئييب بيزه باخدي ياشار.

قاسيم، «اشي، بوشلا، بو گئجه ائله ياخشي گولدوک. سانيرام داها ميرت­آغا'ليق بير شئي قالماييب، اينانميرام او بيزي داها گولدوره بيلسين. بيزي گولدورمک اوچون گرَک بير ايلين گوجونو بير گئجه‌ده خرجله‌سين،» دئييب گولدو.

احمد، «هه، قاسيم دوز دئيير،» دئدي.

ياشار'ين حالي پوزولموشدو، بو سؤزلري ائشيتديکده بير آز اوزو گولدو.

«عئيبي يوخدور، گلمه‌سين، ائله بو گئجه ميرت­آغا'نين کؤلگه‌سي آلتيندا بورا ييغيشديق، سن ميرت­آغا'يا پول وئردين، اونون روحو گلدي بيزي بورادا گولدوردو. نئچه ايلدن سونرا گونده‌ليک حياتين ايچيندن بو گئجه‌ني اوغورلاییب بير آرايا گله بيلديک، بيرليکده دئييب-گولدوک. گلين ميرت­آغا'نين جانينا دوعا ائله­يک. هميشه اونون کؤلگه‌سي بيزيم ييغواميزين اوستونده اولسون! بوندان سونرا ايلده بير دؤنه بورايا توپلاشيب دئييب گوله‌جه­یيک،» دئييب گولدوم.