بَـبـيـرخـان
بَبيرخان سونوندا گليب چيخدي. اون بئش گون
اولموشدو گئدهلي. ايذينه گئتمهدن بير گئجه اؤنجه سنگرده منيم يانيما گلدي.
سؤزونو آغزيندا بير نئچه دفعه دولانديردي، هاوادان سودان دانيشدي. سونوندا منيم
سورغولو باخيشلاريملا قارشيلاشينجا اصل سؤزونو آغزيندان چيخارتدي.
«دئييرم احمد قاغا، بير آز پولون وار، منه بورج
وئرهسن، صاباح ايذينه گئديرم! بيليرسن کي، اوچ آيدير ائوه گئتمهميشم، بیر قیران
پولوم قالماییب!»
«ياخشي. نئچه ايستهييرسن؟» دئيه سوروشدوم.
گؤزلري گولدو. منيم يوخ دئيهجهیيمدن چکينيرميش
دئيهسن.
سئوينهرک، «ائله بير يول کيراسي اولسا، يئتر.
اينشاللا قاييداندا قايتارارام،» دئدی.
او گئديب قايیداندان سونرا منيم ايذين سيرام گلهجکدي.
بؤلویوموزده آز ساييدا عسگر اولدوغونا گؤره، بيزه گئج-گئج ايذين وئريرديلر. منيم
ده سيرام اوچ آيدان سونرا گليب چاتميشدي. بَبيرخان'ين گلديیيني گؤزلهييرديم،
اوندان پولومو آليب، گئديب شهَردن بير نئچه پارچا سووغات آليب کنديميزه گئدهجکديم.
ایذیندن قاییتدیغی گونون صاباحيسي بَبيرخان
بيزيم ياتاقخانايا گلدي. اونو چوخ سئوينجک قارشيلاديم.
«ايذين خوش گئچدي مي؟" گولومسونهرک سوروشدوم.
بَبيرخان، «چوخ ياخشييدي! عاييلهمه، کنديميزه
چوخ داريخميشديم!» دئيه جاواب وئردی.
«تعريفله گؤرک!»
«فورصتينده گليب تعريفلهيهرم. آما ايندي سنه
بير زحمتيم وار.»
هئچ نه دئمهديم. گؤزلريمي اونا زيللهديم.
«بيليرسن کي، منيم يازي-پوزو ساواديم يوخدور،
ايکي خط مکتوب يازديرماق ايستهييرديم، آتا-آناما گؤندهرم، ساغ-سالامات گليب
چاتديغيمي خبر وئرم اونلارا،» دئييب منيم اوزومه باخدی.
«هه، ياخشي،» دئييب، منه ساري اوزاتديغي کاغيذ
قلمي آلديم.
«زحمتدير، باغيشلا! صاباح پوستچو بؤلويه گليب
مکتوبلاري توپلاياجاق. اونا گؤره ايندي گلديم يازديرماغا.»
«نه زحمتي!»
«بئله ياز، احمد قاغا: سالام، عزيز آتا-آنا! من
دونن آخشام گليب خيدمت يئريمه چاتديم. يولدا اوچ دفعه ماشين دَييشمهلي
اولدوم. بيليرسيز کي، کنددن بورا بيرباشا ماشين يوخدور. هله يولون سونوندا ايکي
ساعات دا پييادا گلمهلي اولدوم. آما آللاه'ا شوکور ساغ گليب
چاتديم. هه، بير شئيي ده دئمهلييم. يولدا گلَنده پولومو ماشيندا اوغورلاديلار.
ايندي پولسوزام، منه پول يوللايين، يولداشيمين بورجونو وئريم. آللاه آمانيندا
قالين. هامييا سالام يئتيرين. اوغلوز بَبيرخان!»
سؤزلري بيتجَک منيم چاشقين اوزومه باخدي. نه دئيهجهیيمي
بيلمهديم. سويوق تر باسدي مني. چاشقينليقدان چيخيب اؤزومه گلهنهجن، بَبيرخان
ساغاوللاشيب گئتدی.
بير آز سونرا، سنگردن چيخارکن آيدين'لا قارشيلاشديم.
«بَبيرخاني گؤردوم، الينده کاغيذ وار ايدي. دئيهسن،
بو دفعه سنه مکتوب يازديريب،» دئيه قاققيلدادی.
تعجوبله، «نهدن گولورسن، آيدين؟!» دئديم.
«اونا پول بورج وئرميشدين؟! فيريلداغين بيريدير
ائ! گئچَن دؤنه مندن بورج آلميشدي، مکتوبونو دا منه يازديردي، ایندی ده سنه!» دئيیب
گوله-گوله اوزاقلاشدی.
Comments
Post a Comment