چاتلاق
گۆزگويه باخدی.
«قاش-قاباغا باخ ائ!»
دئيه قوْرولدادي. «سحر تئزدن يوُخودان دوُر، آج-سوُسوز، قهوه‌آلتي يئمه‌ميش ائودن
چؽخ، تؽخاجدا قال، ايشده ده رييسين باشيوا قؽشقيرسين.»
بير داها گۆزگويه
باخدي.
«چوْخ يوْرولموشام،»
دئدي.
يئل پنجره‌ني چؽرپدي.
ديکسيندي، گۆزگو اليندن يئره دۆشدو. تئز اَييليب گؤتوردو. بير نئچه چاتلاق،
گۆزگونون اۆزونو جؽزميشدي. بير داها گۆزگوده اؤزونه باخدي. اۆزونون ساغ-سوْلو
بيربيرينه اوُيموردو، آغزي-گؤزو اَييلميشدي. بؤيوک ننه‌سي‌نين سؤزو يادينا دۆشدو:
«قؽز واختی چوْخ ائلچيم وار ايدي.
بيرينجي ائلچيمين بير گؤزو آلچا دريردي، بير گؤزو چوُوالا ساليردي،»
ائله اؤزونه باخا-باخا قاققيلتي‌سي‌نين سسي اوْتاغي بۆرودو.
Comments
Post a Comment