چیچَکچی
گنج اوغلان چیچَکچیدن آلدیغی چیچَک سبدینین پولونو اؤده‌دی.
«چیچَکچی‌لیک چوخ گؤزل ایش‌دیر!»
چیچَکچی کیشی پولو آلیب سیییرتمه‌یه قویدو.
«ائله‌دیر، من ایشیمی چوخ سئویرم.»
«نئجه اولدو چیچَکچی اولدونوز؟!»
«هئچ، ائله بئله!»
«ائله بئله، نه دئمک؟!»
«منیم بیر سئوگیلیم وار ایدی...»
«یاخشی...»
«هر دؤنه اونون گؤروشونه گئدَنده، پارکدان گول اوغورلاییب آپاراردیم!»
«هاه، هاه..»
«بیر ایل بویونجا هر هفته بو ایشی گؤروردوم.»
«سونرا...»
«بیر گون پارکین بو باشیندان بیر نئچه قیزیل‌گول دریب،
سئوگیلیمین گؤروشونه گئتدیم. پارکین او باشیندا گؤروشدوک. چیچَکلری قیزا ساری اوزاداندا، بیردن قابارلی، قارا بیر
ال بیله‌ییمی قارمالادی!»
«کیم ایدی؟!»
«پارک قوروجولاریندان بیری ایدی! یاخامدان یاپیشدی! دئدیم نییه
بئله ائله‌ییرسن، دئدی نئچه آی‌دیر پارکداکی چیچَک اوغروسونو آختاریرام، سونوندا بوگون
سنی یاخالایا بیلدیم.»
«سونرا نه اولدو؟!»
«هئچ، بیر یاندان سئوگیلیمین یانیندا آبیرسیز اولدوم، کوسوب گئتدی،
بیر یاندان دا پارک قوروجوسو منی پارکداکی پولیسه وئردی.»
«عجب ایش اولوب!»
«هه، هله ماجرا بونونلا دا بیتمه‌دی. پولیس منی محکمه‌یه وئردی،
اوردا منه جزا کسدیلر.»
«جزا می؟!»
«بلی، بیر آیلیق، هفته‌ده اوچ گون پارکداکی چیچَکچی کیشی‌یه کؤمَکچی اولماغیما قرار
وئردیلر!»
«ماراقلی جزایمیش!»
«ائله‌دیر. بیر آی بویونجا هفته‌ده اوچ گون ایکیندی چاغی پارکا گئتدیم،
چیچَکلره باخان کیشی‌یه کؤمک ائتدیم. یاواش-یاواش چیچَک ایشی خوشوما گلدی. جزام
قورتاردیقدان سونرا یئنه ده اورا گئتدیم. چیچَکچی‌لی‌یین سیرلرینی اؤیرَندیم. بئله‌لیکله
چیچَکچی اولماغا، توکان آچماغا قرار وئردیم!»
«نه گؤزل! سونرا سئوگیلینیزه بول-بول چیچَک وئردینیز.»
«یوخ، او کوسوب گئتدی، بیر داها گلمه‌دی، آنجاق من چیچَک‌ساتان
اولدوم!»
دویغویلا دولو بیر حیکایه، همیشه کی کیمین
ReplyDelete