بیتدی
اوْغلان ائیوانا باخان پنجره‌نین آرخاسیندا
اسکی بیر ییرغالانان اوْتوراجاقدا اوْتورموشدو، ائشیکده‌کی قارانلیقدا شهَرین یانان
ایشیقلارینا باخیردی. اؤنونده‌کی ماسانین اوستونده کیچیک بارداقدا یاری‌یاجان ایچکی،
اوْنون یانینداکی کول‌قابیدا ایسه یاری یانمیش سیقارئت وار ایدی.
آرخاداکی تئلئویزیوندان رشید بئهبودوو'ون سسی گلیردی:
«آخار سوُلار دایاندی،
قلبیم حسرتله یاندی،
رأیین نه‌دن دوْلاندی؟!
ایلک گؤروشه گلمه‌دین!
گلمه‌دین، گلمه‌دین،
ایلک گؤروشه گلمه‌دین!»
اوْغلان جیب‌تئلئفونونو گؤتوروب، کیمه‌سه زنگ ائتدی. تتلئفونو قوُلاغیندا
ساخلادی. سیقارئتی گؤتوروب بیر قوُللاب ووُردو، توستونو تاوانا ساری پیله‌دی. بیر
آز دؤزدو، آچان اوْلمادی، تئلئفونو کسدی.
کیچیک بارداغی گؤتوروب ایچکینی قوُرتوملاماغا باشلادی. سسلی بیر
مئساژ گلدی. مئساژی آچدی، گؤزله‌دییی قیزدان ایدی.
«سنه بیر داها زنگ ائله‌مه دئمه‌میشدیم می؟!
بیز اوْ گون هر نه‌یی دانیشدیق. بوُندان آرتیق بیرلیکده اوْلا بیلمه‌ریک، هر نه بیتدی.
بیر ده زنگ ائله‌مه. همیشه‌لیک!»
تئلئفونو ماسانین اوستونه قوْیدو. ایچکی‌نین سوْن قوُرتومونو ایچدی،
سیقارئتی آرد-آردا ایکی یوْل سوْموروب، اوْنو کول‌قابیدا سؤندوردو.
یانان شام اریییب دیبینه چاتمیشدی، آلووو تیتره‌ییب سؤندو.
اوْغلان باشینی اوْتوراجاغین آرخاسینا سؤیکه‌ییب، گؤزلرینی تاوانا زیلله‌ییب،
ییرغالانا-ییرغالانا رشید بئهبودوو'ون گئتدیکجه آلچالان سسینه قوُلاق آسدی:
«گلمه‌دین، گلمه‌دین،
ایلک گؤروشه گلمه‌دین!
گلمه‌دین، گلمه‌دین،
گلمه‌دین یار، گلمه‌دین!
گلمه‌دین،...»
ماهنی سؤسدو.
اوْغلان، «هر نه بیردن بیتدی: اوْ، ایچکی، سیقارئت، شام، ماهنی!» دئدی.
بیر گولوش آتیب اوْتاقدان چیخدی.
Comments
Post a Comment