چاپیق

 

 

1

قار یاغیردی. کیشی، مئیدانین گیریشینده دایانیب، هنده‌وری گؤزدن گئچیرتدی. مئیدانین ساغ طرفینده ایکی گنج، چلله‌یین ایچینده اوْد قالامیشدی. اوْغلانلار هردن یئشیکده‌کی کاغیذلاردان گؤتوروب اوْدا آتیردیلار، اوْد بیر آز آلوولانیردی.

«آلتمیش ایل بوُندان قاباق دا ائله اوْردا اوْد قالامیشدیلار،» اؤزو اؤزونه دئییب، گؤزونو اوْدا زیلله‌دی کیشی...

2

مکتبلی اوُشاقلار توْنقالین اؤنونده سیرا ایله دوزولموشدولر. آرخادا دا بؤیوکلر دایانمیشدی.
«سیرایلا گلین کیتابلاریزی آتین اوْدا،» دئیه‌رک، تئز-تئز باغیریردی اوُنیفورمالی قارا کیشی. «اعلاحضرت'ین امری‌دیر، تورکو کیتابلار بوُگوندن داها هئچ کیمه لازیم دئییل، هامی‌سی یاندیریلاجاق!»

اوُشاقلار بیر-بیر گلیب، کیتابلارینی توْنقالا توُلازلاییب، باغیران کیشی‌یه گؤزالتی باخیب تیزیخیردیلار. یانماقدا اوْلان کیتابلاردان قالاق دوزَلمیشدی.

سیرا اوْنا گلیب چاتدی. گؤزلری سه‌یری‌یه-سه‌یری‌یه، «آ-آ-آتمیرام،» دئییب، اوُدقونا-اوُقونا کیشی‌یه باخدی. «من بو کیتابلاری چوخ سئویرم!»

قارا کیشی، «کس سسیوی، کوچویون بیری کوچوک! قوْدوقلانما!» دئییب، شاپالاغی اۇشاغین قوُلاغینا ائندیردی.
اۇشاق یئره ییخیلدی، باشی پیلله‌نین تینینه دَیدی، آلنی یاریلدی، قان ائله آخدی کی!

آتاسی‌نین سسی قوْوزاندی:

«اوُشاغی نییه ووُرورسان، آی قوْرخاق گئده! گوجون اوُشاغا چاتیر؟!»

سوْنرا ساواشما سسی یوکسَلدی. تاپپیلتی، شاپپیلتی، سؤیوش سسی توْنقالین چیرتیلتی‌سینا قاریشدی.
«قاراش! قاراش! نه اوْلدو سنه؟!» دئیََن آناسی‌نین سسی دَیدی قوُلاغینا.
اوْغلانین گؤزلری قارالدی. باشی‌نین اۆستونده توْنقالین اییی، توستوسو، آداملارین قارالتی‌سی فیرلانماغا باشلادی...

3

قاراش، الی‌یله آلنینداکی چاپیغا توْخوندو، یارانین یئری سیزیلدادی.
«آلتمیش ایل...» دئییب کؤکسونو اؤتوردو.

گؤزلرینده‌کی ایکی داملا یاشی سیلیب یوْلا دوشدو.