آیریلیقدان سوْنراکی آ ی ر ی ل ی ق

 

-         سئوگیلین‌دیر؟

-         سئوگیلیم ایدی!

-         نئجه؟!

-         اسکی سئوگیلیم.

-         نه‌دن اسکی؟!

-         ایللر اؤنجه آیریلدیق، هر نه بیتیب.

-         بیر آز اؤنجه گؤروشدونوز، هر نه یئنیدن باشلایاجاق!

-         یوْخ! بوُ ایمکانسیز!

-         بوُنجا ایلدن سوْنرا گؤروشدونوزسه، بیربیرینیزی اۇنوتمادینیزسا، دئمک، آرادا نه‌سه وار.

-         هئچ نه یوْخ‌دور. اوْ آیریلیق هر شئیی ووُروب داغیتدی.

-         یئنه اوْلاجاق!

-         اوْلماز، بیز یالنیز یوْلداشیق. یعنی، یوْلداش اوْلدوغوموزو بوُگون آنلادیق.

-         نئجه؟!

-         بوُگون گؤروشَنده اۆره‌ییمیز دؤیونمه‌دی، هیجانلاندیق، آنجاق اوْ دا اوُزون ایللردن سوْنرا گؤروشمکدن گلَن نوْرمال هیجان ایدی.

-         ائله هر نه ساده هیجاندان باشلار.

-         یوْخ، بوُ هیجانین ماهیتی فرقلی‌یدی. من هر ایکی هیجانی دا یاشامیشام، اوْنو دا بوُنو دا. قاباقکی هیجان آدامین جانینا یاواش-یاواش ایشله‌ییردی، بوُ ایسه بیردن گلیب سؤندو.

-         نه‌دن قاباقکی هیجانی یاشامادین؟!

-         منجه بئله بیر وضعیت آیریلیغی بوس‌بوتون یاشادیغیمیزدان ایره‌لی گلیر.

-         بوُ نه دئمک‌دیر؟!

-         اوُزون آیریلیقدا زامان وار گوجویله اؤز آغالیغینی گؤستَریر.

-         باشا دۆشمه‌دیم!

-         اوُزون آیریلیقدا زامان ایسته‌دی‌یی کیمی اینسانلارلا داورانیر. یانی، گئچمیش دوُیغولاری، اینسانلاری اۇنوتدورا بیله‌جه‌یی قدَر اوُنوتدورور، ذهنیتلری دَییشدیریر.

-         ماراقلی‌دیر!

-         آیریلیق، زامانلا مکانین بیرله‌شه‌رک یاراتدیغی بیر اوْلغودور. بیر یاندا آیریلانلار وار، اوْ بیری یاندا ایسه زامان-مکان‌لا یاراقلانمیش آیریلیق.

-         بوُنلاری ایندیه‌جن هئچ دوشونمه‌میشدیم!

-         آیریلیغین ایلک گونلرینده، آیلاریندا، ایللرینده اینسانین دوُیغولاری، ذهنیتی دیره‌نیر، آنجاق سوْنرا گؤروشمه اوْلمایینجا دوُیغولار دا، ذهنیت ده تسلیم اوْلماغا باشلاییر. بیر مودّتدن سوْنرا، آرتیق، دوُیغولار کئیی‌ییر.

-         سوْنرا نه اوْلور؟!

-         دوُیغولار کئیی‌یندن سوْنرا آدامین ذهنیتی ده دَییشیلیر. آرتیق، آدام اوْ آیریلدیغی یوْخ، یئنی بیر اینسان اوْلور. بیر آیریلیغا یئنیک دوشَن اینسان سوْنراکی آیریلیقلاری سایماز اوْلور، آرتیق، یئنیلمیر. دئمک، آیریلیغا قارشی آشیلانیر!

-         سوْنوج نه اوْلور؟!

-         اوُزون آیریلیق گؤرموش اسکی سئوگیلیلر یئنیدن گؤروشوب دوْستلاشاندا، آرتیق، یئنی آیریلیقلاردان تأثیرلنمیرلر، اوْنلارین یوْلداشلیغی زامان-مکاندان ائشییه چیخیر، آیریلیغی سیلاحسیزلاشدیریر! یانی اوُزون مودّت اؤنجه آیریلانلار آیریلیقدان بیر تهَر اؤجلرینی آلمیش اوْلورلار!..

Comments

Post a Comment

Popular posts from this blog

تانیش یاد

کافه تۆنلوک‌دور، بوْش ماسا آختاریرام، بۆتون ماسالار دوْلودور. گؤز گزدیریرم، کافه‌نین بۇجاغیندا ، یاری سی شۆشه‌دن اوْلان دوُوارین یانیندا ایکی آداملیق ماسادا بیر قؽز تک اوْتوروب. ماسالارین آراسیندان سوْووُشوب اوْنا ساری گئتمه‌یه باشلاییرام. ماسالاردان دئییب گۆلمک سسی، قهوه-چای و سیقارئت اییی گلیر، کافه‌نین آتموسفئرینی غریبه بیر ترکیب بۆرویوب، قوْخولو سسلر یا دا سسلی قوْخولار!  «بۇرا بوْش مۇ، یوْخسا گؤزله‌دی‌یینیز بیرینین یئری‌دیر؟» دئیه قؽزدان سوْروشورام . قؽز ائشیتمیر. دایانیب اوْنا باخیرام، دالغین گؤرونور، ال تئلئفونونا دالمیش، دئیه‌سن. باشیندا قیرمیزی شال وار، قارا ساچلاری شالین آلتیندان چیخیب اۆزونه و چیینینه تؤکولوب . قیزدان جاواب گلمه‌دی‌یینه گؤره قاییدیب کافه‌دن چؽخیب گئتمک ایسته‌ییرم، دالدان بیر سس ائشیدیرم . «ایسته‌سه‌نیز، اوْتورا بیلرسینیز.» قاییدیرام، قیز منه باخیر، دوْداغیندا سوْلغون بیر گۆلومسه‌مه وار . «اوْتورون، من تکَم.» قیزین قاباغیندا بیر فینجان قهوه وار، بیر آز اوْ یانلیقدا بوْش بیر کۆل‌قابی وار . «سیز ده تک‌سینیز؟!» دئیه سوْروشور مندن . «هه، بۇ...
Read more

اوْلوم‌لا اؤلوم آراسی

اوْغلان آیاغا قالخدی، گؤزونه گؤرونن قارالتی‌نین قارشی‌سیندا دایاندی . «نئجه اوْلور اوْلسون، من بوُ ایشی بیتیره‌جه‌یم، سندن آیریلاجاغام!» بیر آز گؤزله‌دی، قارشی‌سینداکی قارالتی هئچ نه دئمه‌دی . «هه، دئیه‌سن، دئمه‌یه سؤزون یوْخ! اؤزون ده سۇچلو اوْلدوغونو مندن داها یاخشی بیلیرسن.» پنجره‌نین آرخاسینا گئچدی، ائشییه باخدی، قارانلیق ایدی، کۆچه‌ده یالنیز پاخلا-چۇغوندور ساتان کیشی وار ایدی، هامی ائوینه چکیلمیشدی. بیر سیقارئت آلیشدیردی، دریندن سوْموروب تۆستوسونو هیرس‌له پنجره‌نین شۆشه‌سینه پیله‌دی، تۆستو شۆشه‌یه دییب اوْنون اۆزونه ساری قاییتدی، پنجره اوْغلانین بوُ ایشینی جاوابسیز قوْیماق ایسته‌مه‌دی . کۆچه‌ده‌کی پاخلا-چۇغوندور ساتان یاشلی کیشی‌نین یانیندا چۇغوندور یئمه‌یی چوْخ ایسته‌ییردی، آنجاق ایندی‌یه‌جن گئدیب یئمه‌میشدی، کئفی‌نین کؤک اوْلدوغو گۆنو گؤزله‌ییردی. بوُ سوْن آیلاردا داریخماسی لاپ چوْخالمیشدی، بۆتون ایشلرینی یاریم‌چیق گؤروردو، حتا نئچه دؤنه درسی ده یاریم قوْیوب بیلیم‌یوردونو بۇراخماغی دۆشونموشدو، آنجاق آتا-آناسیندان چکیندی‌یینه گؤره بوُ ایشدن هله‌لیک واز گئچمیشدی. یاخ...
Read more