کؤرپونون ایکی یاخاسی (ایکی دقیقه‌لیک اوْیونلوق/پیئس)

 

دؤشه‌مه: شهَردن قؽراقدا، خزَل بۆروموش بیر کؤرپو، بیر گۆز گۆنو. سس‌سیزلیک وار، آنجاق هردن سازاق اسیب خزَللری خؽشیلدادیر.

 پئرسوناژلار:

آیاز: 20 یاشیندا، اۆزگون و اۇمودسوز

آیدین: 40 یاشیندا، سس‌سیز و بیر آز اۇمودلو

 

(آیاز کؤرپونون شهَردن اۇزاق یاخاسیندا دایانیب آشاغی‌یا باخیر، دیکسینیر. آیدین یاواش-یاواش اوْنا یاخینلاشیر.)

 

آیدین (آلچاق سس‌له)

بۇرا گؤزل‌دیر، ائله دئییل می؟ خزَللرین بوْیاسی، سازاغین سسی... سانکی حیات آیری بیر دیل‌له دانیشیر!

آیاز (تیترَک سس‌له)

حیات دانیشمیر، سۇسوب، منه هئچ نه دئمیر!

 

آیدین

من ده بیر واختلار بوُ کؤرپوده دایانمیشدیم، عینی یئرده، عینی سس‌سیزلیکده.

 

آیاز (تعجّوبله آیدینا باخیر)

سن؟!

 

آیدین

هه، اوْن ایل اؤنجه. هر شئی بیتمیشدی منیم اۆچون، اؤزومو اؤلدورمک ایسته‌ییردیم، آما خزَللرین آراسیندا، اوْندایاجان گؤرمه‌دی‌ییم بیر بوْیا گؤردوم، یئپ‌یئنی‌یدی. اوْوسونلاندیم!

 

آیاز

بۇرادا منی ماراقلاندیران نه‌سه یوْخ‌دور.

 

آیدین

من وارام، بۇرادان سوْووُشوردوم، اۇزاقدان سنی گؤردوم، اوْ گۆنوم یادیما دۆشدو!

 

آیاز

نه‌دن اؤزونو اؤلدورمه‌دین؟!

 

آیدین

اوْ یئنی بوْیا قوْیمادی!

 

آیاز

نئجه؟!

 

آیدین

دۆشوندوم حیاتدا هله گؤرمه‌دی‌ییم چوْخ شئیلر و اینسانلار وار.

 

(آیاز گؤزلرینی یۇمور، درین نفس آلیر. آیدین اوْنون یانیندا دایانیر، سس‌سیزجه گؤزله‌ییر.)

 

آیاز

من... قوْرخورام.

 

آیدین

قوْرخماق یاشاماق‌دیر. گل کؤرپودن بیرگه گئچَک، بوُ گئچیش سوْن اوْلمایاجاق، یئنی بیر باشلانغیج اوْلاجاق.

 

(آیاز آیدینا باخیر، یاواش-یاواش کؤرپونون اوْ بیری یاخاسیندان گلیب شهَره ساری یاخاسینا چاتیرلار، سوْنرا صحنه‌دن چؽخیرلار.)